Diretór Ezekutivu HNGV Aniceto Cardoso Barreto. Imajen/Egas Cristovão

DILI,(TATOLI)-Diretór Ezekutivu Ospitál Nasionál Guido Valadares (HNGV-sigla portugés), Aniceto Cardoso Barreto, klarifika katak, sala Very Important Person (VIP-sigla inglés) fó atendimentu ba sidadaun hotu.

Diretór Aniceto Cardoso Barreto, rekoñese katak, dala barak mosu dezentendimentu entre família pasiente ho pesoál saúde sira HNGV nian tanba kama la sufisiente atu akumula hotu pasiente sira.

“Ema barak mai hakarak tama VIP entaun ida mai uluk nia tama uluk ona.  La’ós dehan la atende, maibé atende hotu tanba fatin maka la sufisiente”, hateten Anicato Barreto hodi responde jornalista sira iha HNGV, Tersa (16/4/2019).

Hosi total kama 20 iha VIP ne’e, kama da-uluk no da-ruak oferese ba Very Very Important Person(VVIP-sigla inglés) hanesan lideransa nasaun nian bainhira halo tratamentu iha HNGV enkuantu kama 18 seluk ba sidadaun hothotu inklui ema estranjeiru.

Tuir despaxu ospitál nian iha 2002 estabelese presu ba pasiente timoroan  ne’ebé okupa kama VIP kada loron tenke selu administrativa US$35.00 no estranjeiru US$50.00, ne’e inklui alimentasaun, ai-moruk no atendimentu seluk tan.

Atu akumula pasiente barak liután iha sala VIP, Diretór Aniceto Barreto, hatutan, HNGV iha ona planu to’o 2030 sei aumenta kama 40.

Jornalista: Agapito dos Santos

Editór: Francisco Simões

HAKEREK NO HATÁN

Please enter your comment!
Please enter your name here