Ministra Saude En Ezersisiu atual Vise Ministra Saude, Élia A.A.Dos Reis Amaral, akompaña husi Prezidente Komisaun Funsaun Públika (CFP), Faustino Gomes Cardoso no Diretor Ezekutivu HNGV, Aniceto Cardoso Barreto, fó pose ba Kargu Xefia Unidades iha HNGV. Tersa (16/4/2019). Imajen/Egas Cristovão

DILI,(TATOLI)-Vise Ministra ba Kuidadu Saúde Primáriu  nudár mós Ministra Saúde en Ezersísiu, Élia António de Araújo dos Reis Amaral, akompaña hosi Prezidente Komisaun Funsaun Públika (CFP-sigla portugés),  Faustino Cardoso,  Tersa (16/4/2019), fó pose ba profisionál saúde hamutuk na’in 17 hodi asume kargu xefe departamentu no xefe unidade iha Ospitál Nasional Guido Valadares (HNGV-sigla portugés).

Kargu xefia hirak ne’ebé simu pose ba periodu mandatu tinan 2019 to’o 2023 ne’e kompostu hosi, Milena Maria Lay dos Santos nu’udar Xefe Departamentu Pediatria, Sara Maria  Filomena Xavier  (Xefe Gabinete Kontrolu Kualidade), Lourdes Lay  (xefe departamentu reabilitasaun medika no servisu paliativu),  Xefe Departamentu Laboratóriu Banku Sange, Salman Sagran, Xefe Departamentu Radiolojia, Alberto dos Santos.

Clementino da Costa hanesan Xefe Unidade Nutrisaun, Anabela Markes  hanesan Xefe Unidade Estatístika, Joel João da Silva Guterres  hanesan Xefe Unidade Finansas, Valentim Soares hanesan Xefe Departamentu Planeamentu ba Rekursu Umanus no Estatístika, Samuel Maria dos Reis Araújo Ferreira hanesan xefe departamentu administrasaun, finansas no Lojístika, Luciana Celeste Amaral hanesan Xefe Unidade Emerjénsia, Adelaide Edina Almeida da Costa hanesan  Xefe Unidade Enfermaria Espesiál.

Belina Tuariana Gaio Ximenes hanesan Xefe Unidade ba Medisina Interna Maskulinu, Rosentina da Silva Nascimento  hanesan  Xefe Unidade ba Nefrologia no Hematolójia, Olimpia de Jesus Araújo  hanesan Xefe Unidade Neonatolojia, Fabíola  dos Reis Sequiera hanesan xefe Unidade Kardiolojia no Tratamentu Intensivu no Elfrida Yustina Abuk hanesan xefe Unidade Obstetrísia.

“Ha’u nia masajen ida maka sai xefe la’ós we are the boss  but  you  are the leader, maibé tau iha ita boot sira nia fuan no hanoin katak ita hotu mai atu sai servidór  ida di’ak no kuda nafatin liafuan ida dehan katak saber do cor  fazer do coração. Ita tenke serve ita nia ema ho fuan”, tenik Élia António de Araújo dos Reis Amaral.

Nia husu nafatin ba Xefe sesante sira atu fó nafatin kontribuisaun ba kargu xefia foun sira hodi garante funsionamentu servisu ba atendimentu sidadaun iha ospitál nasionál.

Governasaun da-ualu mós la haluha agradese kontribuisaun kargu xefia sesante sira ba sira nia dedikasaun no prestasaun servisu durante asume kargu.

Mudansa ba substituisaun kargu Xefia iha HNGV,  nudár prosesu dinámiku   no bazeia ba lei ne’ebé prevee tuir  rekizitu nu’udar instituisaun autónomu  bazeia ba dekretu lei nu 38/2016, 14 setembru  no alterasaun dekretu  lei nú11/2012, 29 Fevereiru  ospitál nasionál Guido Valadares no dekretu lei 39/2016 14 Setembru,  hodi define estatutu ospitál nasionál iha kompeténsia tomak atu halo selesaun bazeia ba méritu.

Promosaun kargu xefia ne’e bazeia mós  ba proposta hosi ospitál nasionál,   maka Presidente KFP hasai despaxu  númeru  4579/2017, 24 Novembru  2017 hodi estabelese kompozisaun juri ba halo selesaun  tuir méritu.

No selesaun ne’e liuhosi etapa rigorozu hahú hosi publikasaun  ba vaga, sub misaun, selesaun dokumentu, ezame eskrita no orál no omologasaun no desizaun hosi Komisaun Públika hodi garante transparénsia.

Hosi total kandidatu 120  ne’ebé   konkorre ba vaga 45 maibé finalmente kandidatu 17 maka pasa  tanba ne’e, Komisaun Públika hasai despaxu  númeru 3031/2018  ne’ebé públika  iha  12 Dezembru 2018  hodi nomeia empasadu sira hodi asume kna’ar nu’udar xefe departamentu no unidade  sira.

Iha oportunidade hanesan, Presidente Komisaun Funsaun Públika, Faustino Cardoso hatete, sentidu responsabilidade  no sentidu  estadu  maka importante ba emposadu sira atu hatán ba espetativa povu nian hodi fó atendimentu ida kualidade, profisionál, efisiente liután.

“Sira be ohin simu pose ne’e sertifika aan duni la’ós ami maka sertifika sira maibé sira hatudu aan kompetente duni tuir area responsabilidade bazeia ba vaga ne’ebé sira konkorre ba”,  hateten Élia António de Araújo dos Reis Amaral.

Jornalista: Agapito dos Santos

Editór: Francisco Simões

HAKEREK NO HATÁN

Please enter your comment!
Please enter your name here