Ministru Reforma Lejizlativa no asuntu Parlamentár, Fidelis Manuel Leite Magalhães. Imajen Egas Cristóvão

DILI, (TATOLI) – Governu liuhosi Ministériu Reforma Lejizlativa no Asuntu Parlamentár (MRLAP), ohin hala’o semináriu ida hodi halo konsultasaun públika kona-ba diretu kostumeiru atu valoriza uzu kostume.

Koordenadora ba Reforma Lejizlativa no Judisiáriu atuál portavós  ba MRLAP, Melisia Caldas, hatete eventu ne’e hodi halibur hanoin kona-ba diretu kostumeiru hodi valoriza uzu no kostume iha rai laran liuliu atu konklui uzu no kostume iha sistema jurídiku nasionál.

Konstituisaun RDTL  rekoñese direitu kostumeiru no valoriza uzu no kostume tenke tau  iha lejizlasaun ida, tanba ne’e governu sei prepara lei kona-ba ne’e.

“Lei kona-ba diretu kostumeiru ne’e iha área barak; matenek, diretu ba rai, kazamentu, no oinsá haree ba pratika atu rezolve konflitu iha komunidade nia laran ne’e mós importante”, dehan nia ba Jornalista sira iha edifísiu Ministériu Finansa, ohin.

Ida ne’e parte ida hosi programa reforma judisiáriu nian hodi haree ba justisa tradisionál  hodi artikula ho justisa formál Estadu liuhosi mekanizmu alternativu sira mediasaun, konsiliasaun no arbitrajen.

Nia dehan se lei kostume tradisionál ne’e artikula ona ba lei sei fó benefísiu ida maka sei ajuda setór justisa sira  hodi resolve konflitu ki’ik sira iha komunidade nia leet hanesan konflitu komersiál, administrasaun  no seluk tan atu rezolve liuhosi meiu justisa formál no justisa tradisionál.

Atu halibur tan konseitu hosi ema barak maka MRLAP mós planu ba futuru sei  halo mós konsultasaun  ho autór judisiáriu, sosiedade sivíl, ho lia na’in hodi rekolla dadus atu foti pontu balun hodi tau iha lejizlasaun ne’ebé governu sei prepara.

Oradór iha semináriu ne’e mai-hosi Ministru Reforma Lejizlativa no Asuntu Parlamentár, Fidelis Manuel Leite Magalhães ho tópiku polítika governu kona-ba diretu kostume, eis Sekretáriu Estadu Konsellu Ministru, Avelino Coelho, ko’alia kona-ba diretu kostume no oradór ida seluk hosi relator espesiál ONU ba diretu povu indigna  hodi fahe hanoin kona-ba diretu kostume ne’ebé di’ak ba nasaun hanesan Timor Leste.

Jornalista: Agapito dos Santos

Editora: Rita Almeida

HAKEREK NO HATÁN

Please enter your comment!
Please enter your name here