Ministru Justisa, Manuel Cárceres da Costa. Imajen Egas Cristovão

DILI, (TATOLI) – Governu kontinua negosia ho Estadu Naklibur Amérika (EUA-sigla portugés) liuhosi ninia embaixada iha Dili atu halo renovasaun ba valór arrendamentu rai ne’ebé sira uza.

Tuir pedidu EUA ne’ebé hato’o ba governu atu halo konstrusaun foun ba edifísiu embaixada nian iha área Praia dos Coqueiros Dili, tanba ne’e husu atu halo adiantamentu ba kontratu ne’ebé parte rua estabelese ona.

Ministru Justisa, Manuel Cárceres da Costa, hatete tuir kontratu arrendamentu ne’ebé governu konstituisaun da-huluk estabelese ho Amérika  iha fulan-setembru  2002 hatete fó aluga to’o 2032 no iha posibilidade hanaruk to’o 2052.

“Ita nia maluk Amerikanu sira ne’e husu atu haree fila fali kontratu ne’e, tanba sira hakarak atu harii uma boot, ida agora ne’e hakarak sobu tiha tanba uma ki’ik, hakarak halo edifísiu foun, ne’ebé sira hakarak halo fali adiantamentu ba kontratu”, dehan nia jornalista sira iha Palásiu Governu, ohin.

Kona-ba adiantamentu ba valór arrendamentu ba oin, nia afirma Governu sei iha prosesu negosiasaun ho EUA hodi hetan konkordánsia

Enkuantu hatán ba valór arrendamentu hosi Amérika ba rai Estadu ne’e, Cárceres dehan la lembra.

“Ha’u la dekor, mais sira selu di’ak no sei selu nafatin no agora adiantamentu ida ne’e ami sei  negosia fali nia folin, adiantamentu ba kontratu  arrendamentu ne’e hakerek  hotu iha memorandum entendimentu”, tenik Governante.

Nota entendimentu ne’e hetan ona aprovasaun iha Konsellu Ministru, tanba ne’e fó ona kompeténsia ba Ministériu Negósiu Estranjeiru no Kooperasaun atu halo negosiasaun ho EUA hodi hetan konkordánsia antes tama asina kontratu.

Jornalista: Agapito dos Santos

Editora: Rita Almeida

HAKEREK NO HATÁN

Please enter your comment!
Please enter your name here