PM Taur Matan Ruak, horseik, halo visita ba Sentru Formasaun Tibar. imajen/António Gonçalves

DILI,(TATOLI)-Governu da-ualu ne’ebé lidera husi Primeiru Ministru, Taur Matan Ruak,  komprometidu atu investe maka’as ba sentru formasaun Tibar, hodi prepara rekursu umanu kualifikadu ba timoroan atu partisipa iha prosesu konstrusaun nasaun.

PM Taur Matan Ruak, haree no observa hela rezultadu husi formandu sira ne’ebé tuir formasaun iha Sentru Formasaun Tibar. Imajen/ António Gonçalves

Liuhusi nia vizita ba Sentru Formasaun Tibar, horiseik, Primeiru Ministru (PM), Taur Matan Ruak, apresia nia ksolok no fó nia louvór ba  sentru formasaun refere tanba tuir nia haree iha duni orientasaun servisu ida di’ak hodi transforma juventude timoroan lubuk ne’ebé mak tuir formasaun iha sentru ne’ebá.

 “Hau kontente loos, muito organizadu, ambiente di’ak, hanorin di’ak, ne’e enkoraja loos governu para halo investimentu boot ba oin hodi tau atensaun ba formasaun tékniku profisionál ita nia joven sira nian”, hateten PM Taur Matan Ruak, ba jornalista sira iha Sentru Formasaun Tibar.

Taur hatutan, , daudaun ne’e kestaun mão de obraejizente loos ba Timor Leste, tanba ne’e governu iha obrigasaun atu prepara rekursu umanu ba ninia sidadaun liuhusi formasaun  tékniku profisionál sira ne’ebé estabelese ona iha territóriu.

“Hau fo ona instrusaun ba Sekretariu Estadu Formasaun Profisionál no Empregu (SEFOPE) para servisu ho diretór sira iha sentru formasaun sira, liuliu Becora ho Tibar, atu iha vizaun do’ok tanba kada tinan ita nia joven kuaze rihun 15 maka tama iha kampu servisu tanba ne’e se ita laiha kapasidade absolve ba iha sentru formasaun tékniku profisionál oinsá maka ita bele prepara sira atu hetan empregu”, hateten PM Taur Matan Ruak.

Eis Gerrilleiru ne’e afirma,  alende, haruka timoroan ba servisu iha rai li’ur liuhusi programa servisu temporáriu   (Seasonal Worker Programme) no  Pacific Labour Scheme iha Australia, Servisu iha Korea Súl, no Japaun, hahú iha kompromisu simu timoroan hodi servisu, governu mós tenke prepara timoroan atu servisu ba ninia rai rasik.

“Uza ita nia mão de obra liuliu ita iha ita nia rain, atu nune’e, ita nia ema preparadu atu halo uma ida ka estrada ida uza maka ema rai li’ur de’it depois ita nia ema oinsa?”, Taur Matan Ruak tenik.

Nia dehan, muda mentalidade no karaterístika baruk-teen ba kultura servisu maka’as, fiar malu, disiplina tempu importante ba formandu sira atu aprende hodi nune’e bele forma sira sai sidadaun ne’ebé iha responsabilidade ba ninia aan no nasaun bainhira remata formasaun.

Iha biban hanesan, Sekretáriu Estadu Formasaun Profisionál no Empregu, Julião da Silva hatete, governu sei investe maka’as ba sentru formasaun ne’e atu sai modelu iha Ázia Pasífiku tanba ne’e iha ona planu ba oin atu fornese formasaun ba joven sira 15.000 kada tinan.

Diretór Sentru Formasaun Tibar, Simão Tito Barreto, hatete, graduadu ne’ebé simu ona sertifikadu formasaun ho nivel I,II, III  durante ne’e hamutuk ema na’in 4.585

Iha trimestre da-uluk 2019,  formandu  96 maka hetan ona graduasaun, na’in 217  daudauk ne’e tuir hela formasaun nivel I,II, husi total númeru ne’e 176 tuir hela formasaun ativu  no restu  seluk hala’o hela estájiu kurrikulár iha instituisaun estadu no privadu sira.

Área konstrusaun kontempla sesaun eletrisidade, karpintaria, solda-dura, pedreiru no kanalizasaun, área ospitalidade iha  House Keeping no food Favorage, área agrikultura kontempla iha hortikultura no frutikultura, área enerjia alternativa hanesan Biomasa, biogas no solár Panél, área eletrical instrumentation nivél I,II.

“Ami prepara hela planu atu iha tinan ne’e  sei lansa seksaun rua iha fulan ida ne’e, liuliu formasaun ba ekipamentu pezadu ho nivél internasional ba operador mákina pezadu sira hanesan eskavador, lagartu, silidros no mákina típiku sira ne’ebé uza ba konstrusaun, ita mós hare timoroan mós bele sai  jestór ba iha obra, entaun jestaun obra mós ita sei prepara sai formasaun ida”, esplika Simão Tito Barreto.

Jornalista: Agapito dos Santos

Editór: Francisco Simões

HAKEREK NO HATÁN

Please enter your comment!
Please enter your name here