Diretór Interinu Fundasaun Mahein, João Almeida. imajen/Doc.TATOLI

DILI, (TATOLI)—Fundasaun Mahein (FM) rekomenda ba komandu Polísia Nasionál Timor-Leste (PNTL) atu halo jestaun di’ak ba Ofisiál Polísia Suku (OPS) iha suku.

Tuir Fundasaun Mahein, iha fatin balun OPS la hela metin iha suku tanba tenke ajuda fali serbisu iha Eskuadra Polísia, satán haree ba situasaun suku ne’e nesesidade prinsipál ida maka seguransa.

“Komandu PNTL presiza halo jestaun ba rekursu polísia nian, atu nune’,e OPS ne’ebé koloka iha suku ne’e bele hela permanente no halo serbisu permanente iha suku laran, tanba komunidade balun ho númeru ne’ebé boot, maibé OPS la halo serbisu barak no barak liu deskansa iha edifísiu no hein problema ne’e sai boot hafoin sira fó resposta”, hateten Diretór Interinu Fundasaun Mahein, João Almeida ba Ajénsia TATOLI iha nia kna’ar fatin, ohin, iha Fomento I, Comoro, Dili.

Tuir nia katak, OPS ne’ebé kolokadu iha suku ne’e la halo serbisu permanente tanba Eskuadra Polísia menus rekursu.

“Foin daudaun Fundasaun Mahein hamutuk ho parseiru dezenvolvimentu sira hanesan Fundasaun Ázia hamutuk ho Komandu PNTL halo avaliasaun ida ba OPS iha suku 400 resin identifika ona difikuldade sira ne’e no ami aprezenta ona ba Komandu PNTL no hein katak ho komandu foun ne’e bele haree no ezekuta”, João Almeida informa.

Joâo Almeida hatutan, OPS nia funsaun la’ós de’it halo seguransa, maibé fó asisténsia seluk ba komunidade nia nesesidade tanba komunidade nia espetativa boot liu saida maka OPS iha. Tanba ne’e, liga mós ho formasaun sira kona-ba polisiamentu komunitária, lei atu nune’e bele hatán ba nesesidade tanba ho prezensa OPS ne’e espetativa komunidade ne’e katak OPS hatene buat hotu-hotu.

“Komandu presiza haree rekomendasaun husi avaliasaun ne’e atu bele implementa hodi mellora serbisu OPS para hatán ba nesesidade seguransa komunidade”, João Almeida tenik.

Jornaista: Xisto Freitas

Editór: Francisco Simões

HAKEREK NO HATÁN

Please enter your comment!
Please enter your name here