DILI, (TATOLI) – Diretór Ezekutivu hosi Uniaun Ema ho Defisiénsia Matan (ETBU-sigla inglés), Gaspar Afonso, hatete maioria ema ho defisiénsia matan seidauk asesu edukasaun ho di’ak iha rai laran hodi kontribui ba persentajen alfabetizasaun.
“Hosi demographic survey halo bazeia ba sensu 2015 rejista ema defisiénsia barak no hosi sira ne’e sei hela ho situasaun alfabetizasaun nia laran”, dehan nia bainhira reprezenta ETBU no Asosiasaun Halibur Defisiente Matan Timor-Leste (AHDMTL) hodi relata situasaun ne’e ba Ministru Reforma Lejizlativa no Asuntu Parlamentár, Fidelis Manuel Leite Magalhães, iha Palásiu Governu, ohin.
Nia ezije ba governu atu tau planu prioridade ba ema ho defisiénsia matan atu asesu edukasaun no fasilidade ba ema ho problema matan atu bele partisipa iha prosesu aprendizajen.
“Agora daudauk ita adopta ODS (Objetivu Dezenvolvimentu Sustentavel) katak labele husik ema ida iha kotuk, entaun ami ema ho defisiénsia mós lakohi hela iha kotuk, ami hakarak partilla ho ema hotu hodi partisipa no kontribui ba rai ida ne’e”, tenik Gaspar.
Ministru simu preokupasaun ne’e no promete sei informa iha reuniaun konsellu ministru atu bele diskute no tau iha prátika durante governasaun da-ualu.
Entretantu, konstituisaun RDTL artigu 16 kona-ba universalidade no igualdade; 1) Sidadaun hotu-hotu hanesan iha lei nia oin, no mós iha direitu no obrigasaun hanesan. 2) Labele halo diskriminasaun ba ema ida tanba nia kulit, nia rasa, nia estadu sivíl, nia seksu, orijen étniku, nia lian, pozisaun sosiál eh ekonómiku, hanoin polítiku ka ideolojia, relijiaun, instrusaun eh nia kondisaun fízika eh mentál.
Jornalista: Agapito dos Santos
Editora: Rita Almeida
