Diretór Jerál Estatistica Elias dos Santos Ferreira, Imajen/Egas Cristovão

DILI, (TATOLI) – Ekipa téknika husi Diresaun Jerál Estatístika (DJE) Ministériu Finansa (MF) ho Ministériu Agrikultura no Peska (MAP) prontu ona iha tempu badak sei públika vaga kona-ba sensu agríkula iha nivel munisípiu to’o suku.

Antes atu bá terrenu DJE no MAP halo enkontru jerál ida ba ekipa rekrutamentu hodi fó orientasaun ba sira tanba importante maka iha liña koordenasaun ho estatístika iha munisípiu, Administradór Munisípiu, diretór serbisu agrikultura munisípiu sira, atu nune’e bele halo serbisu ida susesu iha sensu agríkola dahuluk ne’e.

Diretór Jerál Estatístika, Elias dos Santos Ferreira, hatete sensu agríkola sei hala’o iha tinan ida ne’e no presiza ema liu 2584 no ema ne’ebé maka ka’er GPs iha 646 hodi sukat natar no to’os no supervizór 646 no entrevistadór iha 1292 resin.

“Tantu depende ba tamañu husi kada munisípiu, ami aloka ona kada munisípiu ho nia montante ida ne’ebé maka atu halo serbisu iha sensu agrikultura”, Elias afirma iha Kaikoli, ohin

Nia hatutan sensu ida ne’e atraza uitoan tanba prosesu orsamentu ne’ebé tarde, loloos ne’e hala’o sensu ne’e iha fulan-marsu, maibé Prezidente promulga iha fevereiru, entaun tenke atraza, maibé agora, ekipa prontu ona atu bá munisipiu iha tempo badak sei taka vaga no sei halo short list ba ema sira ne’ebé liu para bele halo serbisu.

Hafoin ne’e iha etapa tuirmai sei halo training of trainers (TOT) ba treinadór sira ne’ebé maka sei fó treinamentu ba kada Postu Administrativu, depois maka halo treinamentu ba entrevistadór sira iha postu administrativu hotu-hotu. Pur tantu kada treinadór iha nasionál sei koloka ema na’in-tolu iha kada postu administrativu para fó treinamentu.

“Sira ne’ebé maka sai treinadór ne’e mai husi Diresaun Jerál Estatístika no mós husi Ministériu Agrikultura no Peska inklui mós liña ministeriál ne’ebé tama iha komité tékniku sensu agrikultura ne’ebé maka iha ona esperiénsia iha sensu populasaun umakain 2015 hodi nune’e sira fó treinamentu ba entrevistadór sira”.

Elias orienta ekipa téknika atu rekruta ema loloos tanba hatene katak rekruta ema liu 2584 ne’e obstákulu boot maibé iha ona esperiénsia barak iha sensu populasaun no umakain nune’e tenta para halo ligasaun no koordenasaun ho autoridade lokál para apoia tékniku hodi halo susesu sensu ida ne’e.

Sobre númeru vaga ne’e, Baukau maka barak liu tanba nia populasaun barak liu tuir fali mai Bobonaru tanba ne’e depende ba ninia tamañu, balu bele 170, balu 150 no balu 200 no sei foti ema ida husi kada suku. Tanba ne’e husu ba estudante sira ne’ebé maka iha Dili, filafali bá idak-idak nia suku hodi bele konkorre, tanba kritéria primeiru língua, segundu hatene ninia área no terseiru nia bele kontribui ba nia rai.

Iha sensu ne’e sei husu pergunta en jerál sobre ortikultura, peska, floresta, pekuária, no atividade ne’ebé hala’o iha agrikultura nia pergunta tama hotu iha laran, tanba pergunta sira ne’e mai husi MAP.

Sensu ida ne’e tuir planu sei halo iha juñu-jullu nia laran ho osan ne’ebé prevee milliaun $5.

Iha Sensu Agríkola ne’e sei la uza kestionáriu, maibé uza android tanba iha pilotu ba munisípiu ualu tinan kotuk hetan susesu boot tanba android ne’e nia benefísiu kuandu entrevista hotu umakain ida lokraik ne’e kedan data mai nasionál liga ba internét no iha nasionál bele halo limpeza dadus ba iha sensu, fulan rua hotu bele hetan rezultadu preliminár no  bele fó ba MAP halo planu tuir ninia orsamentu 2020.

Jornalista: Maria Auxiliadora

Editora: Rita Almeida

1 KOMENTÁRIU

HAKEREK NO HATÁN

Please enter your comment!
Please enter your name here