Bee Manas Marobo. Imajen/espesial

DILI,(TATOLI)– Membru Komisaun D Parlamentu Nasionál (PN) ne’ebé trata asuntu Ekonomia no Dezenvolvimentu, sujere ba Governu, liuliu ministériu kompetente atu tau atensaun ba infra-estrutura bázika iha bee manas Marobo.

Bee Manas Marobo. Imajen/espesial

Bee manas Marobo, ne’ebé lokaliza iha foho Ilat Laun nia hun, iha Munisipiu Bobonaro, hori uluk kedas koñesidu nudár fatin distinsaun turístiku. Ho nune’e, iha Governasaun da-neen, Sekretáriu Estadu Polítika Profisionál no Empregu (SEFOPE) liuhusi projetu “turizmu komunitáriu” reabilita no moderniza ona infraestrutura báziku husi ninia orijinalidade.

Liuhusi fiskalizasaun Komisaun D nian iha Munisipiu Bobonaro, foin lalais ne’e, haree mós katak, infraestrutura bázika iha bee manas Marobo presiza tau atensaun di’ak liu tan, liuliu estrada ne’ebé asesu ba bee manas Marobo. Nune’e, bele fó espasu ida di’ak atu ema bele ba desfruta poténsia bee manas Marobo.

Membru Komisaun D, Olinda Guterres nudár relator ba atividade fiskalizasaun komisaun nian hateten,fatin turístika bee manas Marobo presiza infraestrutura báziku no jestór. Tanba bee manas Marobo hanesan fatin turístika ne’ebé atrai turista rai laran no ria li’ur, maibé  problema ne’ebé hasoru mak infraestrutura hanesan estrada, alojamentu no mós otelaria seidauk iha.

Deputada Olinda Guterres husi Bankada KHUNTO  dehan, iha mós problema ba jestaun ne’ebé presiza duni jestór ida atu jere fatin turístika refere. Ho nune’e, komisaun D rekomenda Ministériu Turizmu, Komérsiu no Indústria (MTKI) atu tau matan ba infraestrutura báziku iha fatin turístika ne’e, hodi bele fasilita vizitante sira.

Iha fatin hanesan, Prezidente Komisaun D, Virgínia Ana Belo, haktuir bainhira halo enkontru ho Prezidente Autoridade Bobonaro ho Diretór MTKI, sira mós husu dadus ba vizitante Bee Manas Marobo, maibé tanba laiha jestór sira lahatene númeru ezatu kona-ba ema na’in hira ba  vizita ona.

“Prezidente Autoridade ho diretór sira iha área ida ne’e hanoin hela atu husu ministériu hodi koloka jestór ida ne’ebé sei mai husi autoridade  munisípiu”, Deputada Virgínia Ana Belo hateten.

Komisaun D foin lais ne’e ba vizita Munisípiu Bobonaro hodi observa direta funsionamentu administrasaun públika, ezekusaun programa no projetu liña ministériu sira ne’ebé implementa.

Jornalista: Julia Chatarina

Editór: Francisco Simões

HAKEREK NO HATÁN

Please enter your comment!
Please enter your name here