Sekretáriu Estadu Formasaun Profisionál no Empregu (SEFOPE), Julião da Silva, ho nia estrutura hala’o konferénsia imprensa iha Kaikoli sobre vizita bá Japaun no asina nota entendimentu PLS ho Governu Austrália nian. Foto/Mídia SEFOPE.

DILI, (TATOLI) – Sekretáriu Estadu Formasaun Profisionál no Empregu (SEFOPE), Julião da Silva, informa Governu Japaun responde pozitivu loos no hakarak atu envolve timoroan bá serbisu iha país ne’e.

“Oportunidade hirak ne’ebé Japaun atu oferese ba Timor-Leste iha área 14, maibé ita sei haree área ne’ebé maka disponivel ba Timor-Leste atu partisipa”, Julião afirma iha Kaikoli kuarta, (3/4).

Sobre área sira ne’ebé oferese ne’e sei deside, tanba sei la foti hotu no sei foti haat ka lima ne’ebé Timor-Leste sente katak bele atu kompete ba.

Programa bá Japaun ne’e kuaze nia konteúdu hanesan bá Koreia mak presiza tuir kursu, tanba ne’e SEFOPE husu ba joven sira hodi hakbesik aan ba sentru formasaun sira ne’ebé besik no hetan ona akreditasaun husi Institutu Nasionál Dezenvolvimentu Mão de Obra (INDIMO) SEFOPE nian, nune’e hasa’e koñesimentu.

Julião relata oportunidade serbisu iha Japaun ne’e fó ba timoroan sira ne’ebé iha abilidade médiu hodi bele kompete hamutuk ho nasaun sira seluk.

“Ita espera iha tempu badak bele hetan ona akordu ho Governu Japaun”, Julião dehan.

Governante ne’e relata iha vizita bá Japaun foin lalais ne’e hasoru malu ho ajénsia lubuk ida no sira hakarak iha tempu badak Timor-Leste bele bá ona partisipa iha programa ne’e no sira entuziazmu ho Timor-Leste tanba iha istória.

Aléinde ne’e husi parte Japaun nian husu atu Governu Timor-Leste halo investimentu maka’as hodi hasa’e kualidade sentru formasaun sira, nune’e bainhira de’it atu haruka traballadór sira bele kompete ho país seluk.

Iha parte seluk, Julião da Silva hatete sobre oportunidade serbisu ne’ebé Austrália fó ba Timor-Leste dezde 2012 hodi envolve iha programa serbisu sazonál nian hatudu Timor-Leste hetan dezempeñu ne’ebé di’ak entre nasaun lubuk ida ne’ebé kompete iha atividade ne’e no sai nasaun datoluk ne’ebé haruka nia traballadór barak liu.

Aléinde serbisu sazonál, Timor-Leste ho Austrália foin lalais asina ona nota entendimentu kona-ba Pacific Labour Scheme (PLS) atu Timor-Leste mós partisipa tan iha ne’ebá no sei haruka timoroan sira bá serbisu durante tinan tolu.

“Programa ida ne’e la prejudika ba serbisu sazonál ne’ebé iha tiha ona, fulan neen ne’e kontinua no ba tinan tolu ne’e mós foun ida ne’ebé ita sei kontinua, maibé programa ne’e modelu atu hanesan mós ho Japaun nian, ita sei serbisu hamutuk ho sentru formasaun sira ne’ebé akreditadu husi SEFOPE atu nune’e ita bele hetan forsa traballu ho nia abilidade médiu atu kompete iha merkadu ne’e”.

Liuhusi programa PLS ne’e Governu Austrália fó oportunidade kada tinan atu haruka serbisu-na’in sira liu rihun ida hodi bá partisipa atividade ne’e.

Tanba ne’e husu ba joven sira ne’ebé iha koñesimentu di’ak iha área sira ne’ebé iha tempu badak SEFOPE sei fó sai ne’e tanba sei halo ezersísiu ida hodi deside bainhira bá Japaun nian karik sei deside kompete iha área saida de’it no mós Austrália nian.

“Ita sei anunsia iha tempu badak atu timoroan hotu bele hakbesik aan bá sentru formasaun atu eleva koñesimentu, kapasidade ne’ebé di’ak para kompete iha merkadu ne’e.”

La’ós oportunidade ne’e de’it, maibé sei iha oportunidade seluk husi Oitavu Governu nia polítika hato’o ona katak atu emprega timoroan 60.000 tantu bá iha rai-li’ur no laran. Meiu sira ne’e hotu Governu halo atu fasilita timoroan sira, aléinde atu hetan ekonomia di’ak iha ema nia rai no bele aprende buat foun ruma husi nasaun seluk ne’ebé timoroan sira bá.

Julião salienta iha rekomendasaun ne’ebé Austrália fó bainhira atu partisipa iha PLS mak kontinua uza traballadór sira ne’ebé partisipa iha programa serbisu sazonál atu nune’e sira hasa’e tan kapasidade tuir área ne’ebé sei kompete bá tanba sira iha ona esperiénsia no husu Governu atu halo investimentu maka’as hodi hasa’e kualidade sentru formasaun sira.

Ho Estadu Timor-Leste nia naran SEFOPE agradese ba Governu Japaun no Austrália ne’ebé fó tan ona oportunidade ida hodi bele partisipa iha programa sira ne’e. SEFOPE sei prepara mão de obra ida di’ak liu hodi responde ba nesesidade sira ne’e.

Jornalista: Maria Auxiliadora

Editora: Rita Almeida

2 KOMENTÁRIU

  1. Nusa maka lakoi hadia gestaun ba graduadu foun sira ne’ebe mak seidauk iha konesementu iha area specifiku sira iha ita nia rai laran, nune iha futuru mai bele kompete iha terrenu

  2. Boa tarde! Ha’u fo parabéns ba SEFOPE ninia serviço.

    Ha’u atu husu de’it:
    Iha kriterio balu karik ou lei ruma, molok jovem Timor oan hakarak atu envolve an iha oportunidade ne’ebe Japão fo?
    Documento saída mak precisa ba Timor sra nebe hakarak invole an iha oportunidade ne’e hodi ba serviço iha Japão?

HAKEREK NO HATÁN

Please enter your comment!
Please enter your name here