Ministru Defeza no mós Ministru Seguransa Interinu, Filomeno Paixão. Imajen/ Antonio Goncalves

DILI, (TATOLI)—Kompañia Austal iha Perth, Australia, seidauk konstrui ró rua (2) ne’ebé mak Australia atu apoiu ba Timor-Leste hodi haforsa operasaun iha Kosta Súl.

Ministru Defeza no Ministru Interiór Interinu, Filomeno da Paixão de Jesus, informa katak, kompañia sei konstrui  ró rua ne’e iha tinan 2020 nia rohan no sei finaliza iha Novembru 2023.

“Ró rua ne’e naran Guardian Classe Patroboth ne’ebé iha kapasidade bele halo operasaun iha kosta súl”, hateten  Ministru Filomeno Paixão de Jesus, ba jornalista sira, ohin, iha Palásiu Prezidente Nicolau Lobato, Bairru Pité, hafoin aprezenta relatóriu ba Prezidente Repúblika, Francisco Guterres Lú Olo, kona-ba nia vizita ba kompañia halo ró rua ne’e iha Austrália no mós relatóriu vizita ba Malázia.

Nia dehan, Ministériu Defeza Austrália oferese modalidade barak atu halo kooperasaun ho Timor-Leste, liuliu halo patrullamentu konjuntu iha kosta súl no modalidade seluk maka Timor-Leste bele aluga Austrália nia ró atu bele halo patrullamentu rasik.

Austrália mós disponivel atu konstrui portu Naval Hera no mós iha kosta súl para ró rua ne’e bele atraka. Inklui sei harii mós ofisina para bele halo manutensaun ba ró.

“Ministru Defeza Austrália hateten ba ha’u, intermu jerál, molok ró rua ne’e to’o Timor, portu ne’e tenke prontu ona. Iha tempu tuir mai, nasaun rua sei tuur hamutuk diskute desk ida ka ekipa téknika ida para bele diskute kestaun tékniku ba asuntu refere”, hateten Filomeno Paixão.

Kona-ba vizita ba Malázia, Filomeno informa, nia hala’o enkontru ho Ministru Defeza Malázia hodi halo renovasaun ba nota entendimentu iha área kursu estadu maior, kursu espesialidade no treinamentu sira.

Iha biban ne’e, Prezidente Repúblika konkorda tebes ho kooperasaun ne’e no husu ba Ministériu Defeza katak aleinde halo kooperasaun ho Austrália no Malázia, tenke halo mós kooperasaun ho nasaun seluk hanesan Portugal, Nova Zelándia no selukseluk tan.

Jornalista: Xisto Freitas

Editór: Francisco Simões

HAKEREK NO HATÁN

Please enter your comment!
Please enter your name here