Ministru Justisa, Manuel Cárceres da Costa. Imajen/Egas Cristovão

DILI,(TATOLI)—Ministériu Justisa (MJ) sei hahú implementa polítika desentralizasaun servisu ministériu nian ba Munisipiu Baucau, liuliu kona-ba emisaun pasaporte, produsaun sertidaun RDTL, sertidaun obitu no kontratu arrendamentu rai nian.

Ministru Justisa, Manuel Cárceres da Costa, afirma katak,  tuir polítika governasaun da-ualu sei desentraliza tan servisu ministériu nian ba Munisipiu Baucau no seluk,  liuliu produsaun sertidaun RDTL, emisaun pasaporte, sertidaun obitu no kontratu arrendamentu rai hodi fó atendimentu di’ak liu tan ba sidadaun sira.

“Oe-cússe halo pasaporte no Maliana mós  halo. Ita hanoin took ba iha Baucau no ha’u hanoin ba munisipiu hotu para ema labele mai trata ona pasaporte iha Dili”, informa Ministru Manuel Cárceres da Costa,  bainhira relata servisu ba Primeiru Ministru, ohin, iha Palásiu Governu.

Nia dehan, oras ne’e desentraliza ona servisu, liuliu diresaun notariadu no Teras propriedade ba Munisípiu Bobonaro no Rejiaun Administrativa Espesiál Oe-cúse Ambeno (RAEOA) hodi evita konsentrasaun servisu iha nivel nasionál.

Servisu Notariadu nia kna’ar maka atu fo atendimentu ba sidadaun relasaun ho trata pasaporte, sertidaun RDTL no sertidaun Obitu. Enkuantu, Diresaun Teras no Propriedade atu halo kontrata ba arrendamentu rai estadu no edifísiu estadu sira.

MJ Manuel Cárceres mós informa ba Primeiru Ministru (PM), Taur Matan Ruak, kona-ba rezultadu ezekusaun orsamentu jerál estadu tinan fiskál 2019 iha Ministériu Justisa ne’ebé atinje ona porsentu 17.

Jornalista: Agapito dos Santos

Editór: Francisco Simões

HAKEREK NO HATÁN

Please enter your comment!
Please enter your name here