Ministru Negósiu Estranjeiru no Kooperasaun, Dionísio Babo durante vizita Japaun. Foto: MNEK

 DILI, (TATOLI) – Ministru Negósiu Estranjeiru no Kooperasaun, Dionísio Babo Soares, hatete Timor-Leste hetan oportunidade atu haruka timoroan servisu iha Japaun.

“Kestaun temátika ne’ebé ami aborda, ne’ebé hetan apoiu husi membru Parlamentu balun iha Japaun i Governu Japonés liuhusi Ministru Negósiu Estranjeiru hateten sira primeravez kuandu loke ona dalan atu simu traballadór mai husi rai seluk i sira kontente mós Timor-Leste hakarak aplika”, hateten Dionísio Babo tuir informasaun husi mídia, Ministériu Negósiu Estranjeiru no Kooperasaun (MNEK) ba TATOLI, segunda (1/4).

Tanba ne’e, governante ne’e husu ba timoroan sira, liu-liu foin-sa’e sira ne’ebé hakarak aprende, serbisu, bele serbisu iha Japaun.  “Maibé, tenke pasa ezame balun ou tenke prienxe kritéria balun: primeiru kona-ba koñesimentu jerál, segundu skill (abilidade); kapasidade atu halo saida, terseiru importante tebes mak tenke ko’alia língua Japoneza”.

Diplomata timoroan ne’e katak husu ona ba MNEK Japaun nian atu bele harii mós sentru formasaun língua Japaun iha Timór no governu Japaun konkorda ona.

“Espera katak iha fulan hirak mai bele serbisu hamutuk ho SEFOPE para halo preparasaun sira ne’e hotu i mós SEFOPE atu prepara ita-nia ema sira, tuir test ida rigorozu tebes, tanba mai iha Japaun la’ós serbisu halimar maibé mai Japaun ema-nia étika traballu ne’e rigorozu tebes. Ita manan osan maibé serbisu mós tenke maka’as”, katak tan.

Ministru Dionísio hatutan nia vizita ba Japaun tanba hetan konvite hosi nia omólogu Taro Kano, bainhira vizita Timor iha ámbitu inaugura Ponte Komoro III ne’ebé sarani ho naran Hinode-Bashi ka “Lorosa’e”.

Ministru afirma vizita ne’e hanesan hametin relasaun entre nasaun rua. Alende ne’e ko’alia asuntu estratéjiku ne’ebé mak governu Timor-Leste pretende atu halo no kontinua ho Governu Japonés, liu-liu iha dezenvolvimentu infrastrutura no mós iha kapitál umanu nian inklui akordu traballu ne’ebé sei halo iha futuru.

“Iha vizita ne’e, ami iha oportunidade ko’alia mós ho membru Parlamentu liu-liu grupu traballu ba amizade Timor-Leste i Japaun iha área Parlamentár nian i husu mós sira-nia apoiu nafatin ba Timor-Leste”.

Governante ne’e relembra iha 1999, bainhira referendum liu tiha, Japaun sai hanesan fatin ida ne’ebé halo primeira konferénsia ba preparasaun dezenvolvimentu ita-nia rain nian, liu-liu ba halibur rai-boot sira hodi bele fó tulun atu bele komesa dezenvolve ita-nia rain.

“Entaun iha enkontru ida ne’e, hetan apoiu husi membru Parlamentu sira, ami halo vizita mós ba entidade seluk”.

Nia haklaken: “Importante liu mak hasoru malu ho Ministru Negósiu Estranjeiru Japaun nian ne’ebé ami aborda kestaun lubuk ida li-liu kona-ba relasaun bilaterál Timor-Leste, Japaun no Governu Indonézia iha área oseániku nian; ne’ebé ita pretende serbisu hamutuk oinsá dezenvolve peskas nomós produtu ne’ebé mai husi tasi laran, ne’ebé Japaun ho Indonézia iha esperiénsia, bele aproveita para bele organiza ho forma mais estruturada, liliu iha área peskaria nian”.

Ministru Dionísio Babo mós katak agradese ba governu Japaun tanba sira iha intensaun atu dezenvolve ita-nia terminál Aeroportu Internasionál Nicolau Lobato, Comoro-Dili; ne’ebé tuir ministru katak Japaun tau fundu kuaze dolár milloens haat nulu resin.

“Apoiu husi Governu Japaun nian para halo aeroportu internasionál Díli, Nicolau Lobato ne’e, hanesan aeroportu ne’ebé bele simu aviaun boot no mós hanesan odamatan boot ba ita-nia rain”, konsidera Ministru Negósiu Estranjeiru no Kooperasaun, Dionísio Babo Soares.

Jornalista: Rafy Belo

Editora: Rita Almeida

HAKEREK NO HATÁN

Please enter your comment!
Please enter your name here