Xefe Setór Fronteira Servisu Migrasaun Ministériu Interiór (MI), Inspetór Polícia Ernesto Maia, Imajen/Egas Cristovão

DILI, (TATOLI) – Xefe Setór Fronteira Servisu Migrasaun Ministériu Interiór (MI), Inspetór Polísia Ernesto Maia, informa tuir dadus estatístika Servisu Migrasaun nia kona-ba movimentu ema tama-sai liuhusi aeroportu Nicolau Lobato, Dili hatudu katak tuun.

Xefe Setór Fronteira Servisu Migrasaun ne’e relata iha jeneiru movimentu ema tama mai Timor-Leste hamutuk 9.325 no sai iha 8.432 no kompara fevereiru ema tama iha 6.209 no sai iha 6.837.

“Entaun komparasaun tuir estatístika ida tama ne’e iha fulan-janeiru mai fevereiru ne’e, tuun maka’as liu. Estatístika movimentu tama-sai ne’e tun relasiona ho ita-nia billete aviaun ne’e karun tebes entaun bele difikulta ita-nia pasajeiru husi rai-laran ou rai-li’ur la halo movimentasaun”, Ernesto afirma ba TATOLI iha Vila-Verde, ohin.

Aléinde ne’e impase polítika ne’ebé afeta ba traballadór estranjeiru sira atu mai halo serbisu ne’e paradu tanba obra seidauk la’o entaun la halo movimentasaun.

Nia mós informa kona-ba movimentu ema tama-sai liuhusi fronteira terrestre liuliu Batugadé iha janeiru nian dadus indika ema tama hamutuk 7.007 no sai 5.927, enkuantu iha fevereiru ema tama Timor-Leste iha 4.890 no sai 5.057.

Husi númeru ema tama-sai ne’e dadus indika timoroan maka aas tebes depois Indonézia, Xina, Filipina no Austrália.

Xefe Setór Fronteira Servisu Migrasaun ne’e afirma tan bainhira kompara movimentu ema nian iha 2018 mai agora ne’e, iha tinan kotuk ema tama-sai ne’e sa’e dook liu kompara ho agora.

Iha parte seluk hatán kona-ba servisu migrasaun nian, Ernesto dehan sira iha difikuldade ida tanba sistema ba jestaun fronteira ne’ebé monta dezde 2013 paradu, tuan liu ona.

“Ami-nia ekipamentu sosa ona atu instala iha fronteira hotu liuliu atu deteta ema sira kontrabandu ho blacklist (lista metan) sira ne’e para sira tama karik ita-nia sistema bele deteta, ne’ebé ami espera iha 2019 ne’e bele instala para asegura territóriu Timor-Leste”.

Setór Fronteira hanesan setór ida ne’ebé haree liu kontrolu movimentu ema tama no sai liuhusi liña fronteira iha territóriu Timor-Leste no halo desizaun atu permite ou rekuza ema tama-sai tuir lei númeru 9/2013, 15 outubru nian.

Jornalista: Maria Auxiliadora

Editora: Rita Almeida

1 KOMENTÁRIU

  1. Dalan seluk, at halbur estrgeiros mk prsja hdia ftin turismo at nune estrngeiro sra mos bele pasa frias ba ita rai. Ita hre hnsan dempasar bali ih rendimentu as tbes tmb sra ih fatin turismo nebe brak no mesak furak dt. Hsi ftin trsmo refre sra kria meios oin2 i logika hdi htan osan tama mos makaas. Seluk hu hkrak htte mos ktak… ita mos prsija kria meios nbe logika hodi halo selu tasa ba estrngeiros ou trablos sra nbe tama fali ba ita rai doben timor leste. Laos nran hruka ema slu arbiru hsan nudar siddaun timor mk tama ba ninian rai doben mos hruka slu htu sasan elektronika nbe nia uja, afinal 1 dt. Maneiro 1 hnsan ne los mk ne glae?

HAKEREK NO HATÁN

Please enter your comment!
Please enter your name here