Sekretáriu Estadu Formasaun Profisionál no Empregu, Julião da Silva, ho Ministra Negósiu Estranjeiru Governu Federál Austrália, Marise Payne. Foto/Mídia SEFOPE.

DILI, (TATOLI)-Governu Timor-Leste liuhusi Sekretáriu Estadu Formasaun Profisionál no Empregu (SEFOPE) ho Governu Federál Australi,  asina ona akordu bilaterál iha área empregu esteriór, atu oinsá maka envolve timoroan iha programa Pasific Labour Scheme(PLS).

Informasaun ne’ebé Ajénsia TATOLI asesu, ohin, husi pájina ofisiál SEFOPE katak memorandu entendimentu ida ne’e diretamente asina husi Sekretáriu Estadu Julião da Silva ho Ministra Negósiu Estranjeiru Governu Federál Austrália, Marise Payne.

Selebrasaun akordu ne’e asiste mós husi embaixadór Timor-Leste iha Australia ho nia ekipa no mós husi parte Governu Federal Austrália  nian rasik, ho intensaun  atu  hahú iha tinan ne’e no oinsá atu fó oportunidade ba timoroan hodi bele hetan viza serbisu nian iha país viziñu ne’e ba tinan tolu nian.

“Espera ho meiu ne’e bele fó oportunidade barak liután ba timoroan sira hodi bele hadi’a ekonomia família nian”, refere pájina ne’e.

Asinatura nota entendimentu ne’e realiza tanba iha reuniaun Konsellu Ministru nian iha 20 Marsu, foin lalais ne’e, entrega ona podér ba SEFOPE hodi bele realiza akordu ida ne’e.

“Iha modalidade foun bolu Pacific Scheme, ida ne’e inklui Timor-Leste no modalidade foun ne’e hanesan envezde fulan neen-neen de’it, bele bá fulan sia, bele bá to’o tinan tolu no hasa’e mós númeru traballadór Timor-Leste nian atu bá Austrália”, Ministru Estadu Prezidénsia Konsellu Ministru, Hermenegildo Augusto Cabral Pereira, informa hafoin reuniaun KM iha Palásiu Governu, foin lalais ne’e.

Ministru Hermenegildo dehan, SEFOPE husu planu podér husi KM atubele asina ho Austrália no KM konsede no fó mandatu ba SEFOPE atu asina akordu ida ne’e hodi bele avansa prosesu rekrutamentu.

PLS ne’e programa ida husi Governu Australia ne’ebé hahú iha Jullu 2018, no fó dalan ba traballadór sira iha nasaun oioin husi rejiaun pasifika sira hotu atu kandidata aan hanesan servisu-na’in ho kualifikasaun ki’ik no natoon iha área rurál Austrália nian.

Jornalista: Maria Auxiliadora

Editór: Francisco Simões

1 KOMENTÁRIU

  1. Kalan diak ba senhor ou senhora nebe atende kona ba pls karik w bele hetan dadus balu husi programa pls nia no ninia prosesu hahu nian new

    Obrigadu
    Nebe w sira tia ona w nia email iha okos

HAKEREK NO HATÁN

Please enter your comment!
Please enter your name here