DILI,(TATOLI)–Primeiru Ministru, Taur Matan Ruak, ohin, iha Palásiu Governu, bolu urjente Ministra Edukasaun Juventude no Desportu, Dulce de Jesus Soares, Sekretáriu Estadu Juventude no Desportu, Nélio Isaac Sarmento, ho mós Sekretáriu Estadu ba Protesaun Sivíl, Alexandrino de Araújo, hodi fó orientasaun ba Komisaun Reguladór Arte Marsiál (KRAM), atu halo avaliasaun ba grupu arte marsiál tolu ne’ebé governu suspende ona sira nia atividade, tinan hirak liu ba.
Arte marsiál tolu ne’e, kompostu husi Persaudaraan Setia Hati Terate (PSHT-sigla Indonézia), Ikatan Kera Sakti (IKS-sigla Indonézia) ho Kmanek Oan Rai Klaran (KORK).
“Primeiru Ministru fó orientasaun ba KRAM atu servisu didi’ak halo aproximasaun no enkontru ho populasaun ba ezisténsia arte marsiál”, informa Sekretáriu Estadu Juventude no Desportu, Nélio Isaac Sarmento, ba jornalista sira, hafoin enkontru ho PM Taur Matan Ruak, hodi relata mós atividade KRAM nian.
Xefe Governu propoin atu KRAM halo servisu ho di’ak hodi prodús relatóriu ida ne’ebé sei apoiu governu atu foti desizaun ba pedidu lider organizasaun arte marsiál tolu, molok re-ativa sira ninia atividade.
Nelio Isaac Sarmento, hateten, relatóriu KRAM nian mós sei apoiu lider polítika sira, atu foti konkluzaun bainhira hasai deklarasaun ba públiku, liuliu atu re-ativa organizasaun arte marsiál PSHT, IKS ho KORK.
“Agora ami sei hamutuk ho KRAM para trasa atividade saida maka atu halo iha tempu badak”, hateten Sekretariu Estadu Nelio Isaac Sarmento.
Jornalista: Agapito dos Santos
Editór: Francisco Simões