Ministru Justisa, Manuel Cárceres da Costa. Imajen/ Egas Cristovão

DILI,(TATOLI)–Atu eleva di’ak liu tan koñesimentu servidor estadu nian iha setor publiku no setor judisiariu, maka kapasitasaun rekursu umanus impornte tebes. Tanba ne’e, ohin, Ministru Justisa (MJ), Manuel Cárceres da Costa ho Prokuradór Jerál Repúblika (PJR), José da Costa Ximenes, halo enkontru ida iha Edifísiu Prokuradór Jerál Repúblika (PJR), Dili, hodi ko’alia no introdús ba malu, kona-ba oinsá atu implementa planu formasaun ba prokuradór timoroan sira.

“Ami rua ko’alia liu kona-ba formasaun atu forma tan maluk sira atu sai prokuradór, sai ofisial da justisa ba ministériu públiku atu nune’e ita bele aumenta númeru prokuradór”, informa Ministru Justisa (MJ), Manuel Cárceres da Costa,  ba jornalista, hafoin hasoru malu ho PJR, José da Costa Ximenes.

Daudaun ne’e pesoál prokuradór na’in 30-resin no juis na’in 30-resin de’it mak hala’o servisu hodi atende servisu sira tribunal ho ministériu públiku nian. Tuir, Ministru Manuel Cárceres, númeru ne’e la sufisiente ho nesesidade atendimentu ba povu iha setór asesu ba justisa.

“Ita sei falta juis no prokuradór sira tanba ne’e ha’u mai atu troka ideas ho prokuradór atu 2020 ita komesa forma jurista foun sira atu reforsa tan ita nia prokuradór sira  iha ministériu públiku, nomos formasaun ba ofisial justisa sira ne’ebé oras ne’e servisu iha ministériu públiku” hateten Ministru Manuel Cárceres.

Nia mensiona katak, antes implementa formasaun ba nivel prokuradór, juis no ofisial justisa sira, sei halo uluk reforma ba sentru formasaun jurídika,  liuliu hadi’a kurríkulu.

“Ema ne’ebé atu hasai formasaun iha Sentru formasaun Judisiáriu iha Caicoli, Dili, , se nia ba atu sai prokuradór tenke  ba duni prokuradór no ba para sai juis tenke sai juis, nune’e defensór públiku no ofisial justisa ho  advogadu privadu”, Manuel Cárceres tenik.

Bainhira kurríkulu hadi’a tiha ona, tuir nia,  hein de’it konsellu jerál sentru formasaun aprova  depois ministériu justisa lori ba diskute iha Konsellu Ministru no públika iha jornál da repúblika hodi tama iha vigór.

Iha konseitu Konsellu Jerál Sentru Formasaun Jurídiku ne’e, sei envolve mós jurista senior sira, hanesan eis Prokuradór Jerál Longuinhos Monteiro, Ana Pessoa, Manuel Tilman, ho intensaun atu bele aproveita sira nia esperiénsia hodi fahe mós ba formadu sira iha sentru formasaun ne’e.

Jornalista: Agapito dos Santos

Editór: Francisco Simões

HAKEREK NO HATÁN

Please enter your comment!
Please enter your name here