Estrada Diresaun Palapaso, Dili. Imajen/Egas Cristovão

DILI, (TATOLI)-Organizasaun Naun Governamentál (ONG) Luta Hamutuk, nudár  Institutu ba Peskiza, Advokasia no Kampaña,  preokupa ho kualidade mega projetu estrada Dili-Liquiça-Ermera ho Dili-Ainaro.

Mega projetu ne’ebé finansia husi osan empréstimu ka deve ne’e, nia finalidade obra ladún iha nia kualidade fíziku.

Diretór Luta Hamutuk, José Alves da Costa, Imajen/Egas Cristovão

Evidénsia ne’ebé Luta Hamutuk aprezenta la iha kualidade ba obra estada hirak ne’e, hanesan iha  área sede Suku Tibar leten diresaun Tibar ba Gleno (Ermera), área Mausoi, área merkadu Seloi Karaik (Diresaun Aileu-Dili) , área sede Suku Tibar nia leten (Diresaun Tibar ba Gleno), área Kaitehu fatuk dulas nian (Diresaun Tibar ba Liquiça), área Kaitehu-estrada laloran (Diresaun Tibar ba Liquiçaá) no mós estrada sira balun ne’ebé mak nia obra la’o hela.

Diretór Ezekutivu Luta Hamutuk, José Alves da Costa, hateten katak, Luta Hamutuk, inklui públiku preokupa ho kualidade estrada sira ne’e tanba estrada sira ne’e uza hela osan husi empréstimu ka deve nian, maibé ninia kualidade ne’e ladún garante ba iha tempu naruk.

“Ida ne’e mak hanesan preokupasaun ne’ebé Luta Hamutuk foti tanba ita hanoin katak osan ne’ebé  mak ita empresta husi ajénsia sira seluk hanesan ADB, JICA, EXIM Bank, World Bank; osan hirak ne’e ita hakarak investe iha setór infraestrutura, tenke ho kualidade para ita bele uza ba tempu naruk, maibé no fin ita asiste katak estrada sira hanesan Liquiça ho Ermera finaliza dezde 2016 atu tama 2017, agora daudauk kondisaun ladún di’ak”, hateten Diretór Luta Hamutuk, José Alves da Costa, ba Ajénsia TATOLI, ohin, iha edifísiu Luta Hamutuk, Farol-Dili.

Diretór ne’e reforsa, alende estrada sira ne’ebé nia mensiona inklui mós estrada sira balun ne’ebé mak nia obra la’o daudaun hela hanesan Ainaro, Aileu inklui husi Dili ba Daré ninian ne’ebé hahú kotu no  nakfera.

“Ida ne’e mak hanesan ami-nia preokupasaun ne’ebé mak ami presiza liuhusi deklarasaun ne’ebé mak aban (kinta, 28/03) ami sei halo, hanesan reafirmasaun ba ita-nia governu ne’ebé mak foin mai. Entaun hafanu oinsá atu tau atensaun maka’as iha kestaun ida ne’e”, hateten José Alves da Costa.

Luta hamutuk husu entidade estadu tau konsiderasaun no rekomenda ba oitavu Governu Konstitusionál hodi bele tetu nune’e bele asegura osan empréstimu sira hetan duni nia rezultadu ne’ebé pozitivu no uza ba tempu naruk.

Ba Ministériu Obras Públika, Luta Hamutuk rekomendadu atu avalia imediata serbisu kompañia implementadór no tékniku konsultante internasionál sira ne’ebé mak durante ne’e hala’o sira-nia kna’ar no responsabilidade.

Husu Ministériu Obras Públika (MOP) atu avalia serbisu Ajénsia Dezenvolvimentu Nasionál (ADN) no Tékniku Supervizór Obras Públika ne’ebé mak durante ne’e halo kontrolu ba kualidade projetu sira tanba tuir observasaun Luta Hamutuk,  hatudu katak, ADN no tékniku sira la hetan susesu iha prosesu kontrolu ninian.

Ba MOP, Banku Dezenvolvimentu Aziátiku (ADB-sigla inglés), Banku Mundiál, JICA (Ajénsia Kooperasaun Internasionál Japaun), EXHIM Bank no ajénsia sira ne’ebé mak fó empresta osan ba Governu Timor-Leste, Luta Hamutuk rekomenda atu  imediatamente halo sorumutuk ida hodi avalia fila fali kontratu sira ne’ebé fornese ona ba kompañia implementadór sira tanba projetu sira ne’ebé mak mensionadu la hatudu kualidade di’ak no hamate timoroan sira-nia esperansa ba utilizasaun estrada tempu naruk nian.

Luta Hamutuk mós rekomenda ba Komisaun Anti Korrupsaun (KAK) hodi investiga kompañia implementadór sira ne’ebé mak halo projetu hirak ne’e, nune’e bele identifika huun husi problema sira ne’ebé mak hamosu projetu la iha kualidade.

Iha fatin hanesan, Luta Hamutuk divulga mós montante empréstimu sira ne’ebé mak governu halo ho ajénsia internasionál ba Projetu Estrada Tibar ba Liquiça, Tibar ba Ermera no Díli, Aileu no Ainaro sira katak montante empréstimu  ba ADB ba projetu hadi’a rede rodoviária (sesaun estrada Dili-Liquiça no Tibar-Gleno) hamutuk millaun US$ 40.000,00.

Montante empréstimu husi Banku Mundiál ba projetu rodoviária rezilénsia klimátika, Solerema-Ainaro hamutuk millaun US$ 40.000,00. No kontribuisaun governu nian ba projetu hadi’a rede rodoviária (sesaun estrada Dili-Liquiça no Tibar-Gleno) hamutuk millaun US$ 137.000,00 no mós ba rezilénsia klimátika, Solerema-Ainaro (seidauk divulga-red).

Polítika no fonte empréstimu/deve husi Governu Timor-Leste estabelese ona iha Planu Estratéjiku Dezenvolvimentu 2011-2030 no iha lei dívida públika, empréstimu konsensionál konstitui fonte finansiamentu potensiál ida ne’ebé sei hetan konsiderasaun husi governu ho objetivu hodi finansia projetu infrastrutura estratéjiku.

Razaun hodi opta ba empréstimu konsensionál ne’e fahe ba parte tolu. Ida, kustu tomak husi empréstimu konsensionál menus liu kustu oportunidade bainhira dada sai montante ne’ebé hanesan husi fundu estrutura. Ne’e tuir Luta Hamutuk katak  rekursu ba empréstimu permite poupansa líkida (net saving)  em termos despeza públika.

Daruak, tuir Luta Hamutuk, empréstimu fó posibilidade atu habelar kustu finanseiru projetu infrastrutura durante periodu ida ne’ebé korresponde di’ak liu ho vida ekonómika husi asset (inventáriu) refere tanba konsidera ne’e aumenta ekuidade interjerasionál. Datolu, empréstimu konsensionál husi parseiru dezenvolvimentu dalabarak akompaña ho asisténsia téknika ne’ebé ajuda governu reforsa padraun implementasaun projetu.

Mobilizasaun empréstimu ne’e hala’o tuir Lei Dívida Públika (Lei nú. 13/2011), ne’ebé estabelese kritéria lubun hanesan matadalan fundamentál. Partikularmente ne’e afirma katak jestaun dívida públika tenke hetan orientasaun ho prinsípiu ne’ebé rigorozu no efisiénsia ne’ebé inklui: mantén ekilibru finansa públika iha tempu médiu no naruk; minimiza kustu direta no indireta iha tempu naruk; asegura disponibilidade finansiamentu iha kada siklu orsamentál.

Evita konsentrasaun servisu dívida temporal ne’ebé exesivu no evita risku exesivu inklui promove funsionamentu merkadu finanseiru ne’ebé balansu n efisiente.

Atu asegura oinsá bele mantén prinsípiu hirak ne’e, tuir sosiedade sivíl Luta Hamutuk katak rekursu ba empréstimu konsensionál ne’e planeadu no rigorozu no implementa husi governu tuir aprovasaun kada tinan husi Parlamentu Nasionál.

Tuir mai, sustentabilidade dívida públika nan hetan avaliasaun regulár husi Ministériu Finansa internalmente no Fundu Monetáriu Internasionál (FMI) externalmente.

FMI iha ninia relatóriu artigu IV konsultasaun 2016 ikus liu, apoiu atu uza barak liu finansiamentu konsensionál ba projetu boot, ne’ebé sei hamenus dependénsia ba dada-sai osan husi Fundu Mina-rai no mós kontribui ba sustentabilidade fiskál. Iha 2017, montante másimu ba dívida públika ne’ebé governu bele negosia mak tokon $500.

To’o agora, tuir Luta Hamutuk, governu asina ona pakote empréstimu hitu hamutuk kuaze tokon $321, hodi apoiu projetu infrastrutura ho retornu ekonómiku no sosiál ne’ebé aas. Maibé, tanba fundu empréstimu disembolsa diretamente tuir progresu projetu nian no tanba projetu balun sei iha faze inisiál, ezekusaun osan dívida públika atuál no fulan jullu 2016 hamutuk tokon $59.7.

Pakote empréstimu neen ne’ebé governu foti atu uza ba rehabilitasaun no hadi’a rodoviária nasionál no pakote empréstimu  ida uza hodi hadi’a drainajen iha Díli, Luta Hamutuk fó sai katak Projetu Hadi’a Rede Rodoviária, sesaun estrada Dili-Liquiça no Tibar-Gleno (asina husi GoTL no ADB iha 2012).

Tuir mai, Projetu Hadi’a Rodoviária Nasionál, nú. 1 Dili-Manatuto-Baucau (asina husi GoTL no JICA), Projetu Hadi’a Rede Rodoviária Rezilénsia Klimátika, Dili-Ainaro (asina husi GoTL no Banku Mundiál iha 2013).

Projetu Hadi’a Rede Rodoviária, Manatuto-Natarbora (asina husi GoTL no ADB iha 2013. Finansiamentu adisionál ba Projetu Hadi’a Rede Rodoviária (projetu rodoviária via-dupla (dual carriageway) Tasitolu-Tibar) (asina husi GoTL no China EXIM Bank iha Dezembru 2015) no mós finansiamentu adisionál ba Projetu Hadi’a Rodoviária (Baucau-Lautem, Maubara Karimbala no Atabae-Mota Ain) ( asina GoTL no ADB iha Marsu 2016)

Jornalista: Rafy Belo

Editór: Francisco Simões

HAKEREK NO HATÁN

Please enter your comment!
Please enter your name here