Primeiru-Ministru, Taur Matan Ruak, prezide enkontru Konsellu Ministru iha Palásiu Governu, tersa, (12/2/2019). Imajen Egas Cristovão

DILI, (TATOLI– Governu liuhusi reuniaun Konsellu Ministru, ohin aprova ona proposta nota entendimentu (MoU, sigla inglés) kona-ba kontratu arrendamentu ba terrenu embaixada Estadu Naklibur Amérika (EUA-sigla inglés) iha Timor-Leste.

Proposta ne’e aprezenta husi Ministru Negósiu Estranjeiru no Kooperasaun en ezersísiu, Hermenegildo Augusto Cabral Pereira, no Ministru Justisa, Manuel Cárceres da Costa.

Ministru Justisa hatete EUA hakarak hadi’a sira-nia embaixada no iha kontratu arrendamentu ho Estadu, tanba fó aluga uma no rai iha Praia dos Coqueiros ba EUA.

“Konsellu Ministru aprova atu MNEK ho embaixadora Estadu Unidu Amérika asina memorandu entendimentu ida atu fó rai ne’e ba sira aluga ba tempu naruk”, Ministru hatete ba jornalista sira iha Palásiu Governu hafoin soru-mutu KM.

Ministru hatutan kontratu arrendamentu iha ona no daudaun ne’e atu halo aditamentu ba kontratu ne’e depois haree termu sira ne’ebé Estadu Timor-Leste liuhusi Ministériu Justisa propoen.

Nune’e saida maka EUA através nia embaixada haree no to’o akordu ida asina kontratu arrendamentu ne’e.

Memorandu ne’e sei define termu husi arrendamentu terrenu no regra sira ba konstrusaun no alterasaun ba instalasaun diplomátika.

Jornalista: Maria Auxiliadora

Editora: Rita Almeida

HAKEREK NO HATÁN

Please enter your comment!
Please enter your name here