Prezidente Repúblika, Francisco Guterres Lú Olo, halo abertura ba programa eliminasaun TBC iha RAEOA, segunda, (25/3/2019). Imajen Xisto Freitas

OEKUSI, (TATOLI) – Prezidente Repúblika, Francisco Guterres Lú Olo, hateten tenke kombate moras tuberkoluze ho transversál ka integra ba sistema saúde públika.

“Ha’u konkorda ho polítika ida ne’e, tanba ne’e maka ha’u mai hamutuk ho ita-boot sira (komunidade) para bele hamutuk halo kompromisu ida ne’e, la’ós de’it iha Oekusi maibé iha Timor laran tomak oinsá maka bele kombate moras refere”, Xefe Estadu dehan liuhusi ninia deskursu iha seremónia ho tema “Planu Rejionál ba Eliminasaun Moras Tuberkoluze iha RAEOA” iha aula Alfándega Palaban, Sub-rejiaun Pante Makassar, Rejiaun Administrasaun Espesiál Oekusi-Ambenu (RAEOA), Segunda (25/3).

Iha okaziaun espesiál ne’e, Lú Olo hakarak kongratula responsável sira tomak liu-liu Prezidente Autoridade RAEOA, Marí Alkatiri, ba inisiativa importante ida ne’e tanba tuberkoluze (TBC-sigla ingleza) hanesan moras ida ne’ebé bele prevene, bele halo tratamentu no bele kura.

Lú Olo hatutan TBC sei hasai ema nia moris iha nivel ida ne’ebé aas teb-tebes iha Timor-Leste no tuir dadus internasionál ne’ebé iha katak taxa mortalidade Timor-Leste aas liu kompara ho nasaun 10 iha rejiaun sudeste aziátika.

“Prezidente Repúblika preokupa liu-tan bainhira haree katak moras TBC afeta populasaun, liu-liu joven ne’ebé ho idade entre 15 to’o 34 ka porsentu 40 hosi totál ema moras. Ida ne’e hanesan dezafiu boot ida ba ita-nia Estadu”, subliña.

Tuir konstituisaun RDTL, Lú Olo esplika kuidadu médiku hanesan direitu fundamentál ba sidadaun hotu no haruka governu atu promove no harii sistema nasionál saúde ne’ebé universál, jerál, gratuita, desentralizadu no partisipativu.

Tanba ne’e, Lú Olo tenik instituisaun relevante iha Timor laran tomak iha responsabilidade ne’ebé boot hodi serbí populasaun tomak atu garante sidadaun hotu iha asesu ba serbisu saúde ida ne’ebé kualidade no responsabilidade.

“Saúde hanesan kondisaun fundamentál atu sustenta dezenvolvimentu ba kualker nasaun ida. Dezenvolvimentu ida ne’ebé sustentável tenke harii ho respeitu ba direitu fundamentál sidadaun nian. Signifika motór ba dezenvolvimmentu maka ema no ita ema moris maka halo dezenvolvimentu. Ne’e duni, dezenvolvimentu bele halo bainhira ita-nia sidadaun hetan saúde di’ak”, tenik.

Prezidente Repúblika husu ba governu atu tau orsamentu adekuadu para bele aplika polítika iha área saúde no tenke hatene halo parseria estratéjika ho instituisaun nasionál no internasionál ne’ebé iha kapasidade no espesialidade ba setór ida ne’e (saúde).

Nia salienta moras TBC mós hanesan problema sosiál ida. Katak, populasaun ne’ebé moris iha kiak nia laran, liu-liu iha fatin ne’ebé la asesu ba moris di’ak maka sai vulnerável liu atu hetan moras TBC, entaun sira buka asisténsia médika tarde no bainhira ida ne’e akontese sei da’et ba ema seluk.

Jornalista: Xisto Freitas

Editora: Rita Almeida

HAKEREK NO HATÁN

Please enter your comment!
Please enter your name here