Provedora Direitus Humanus no Justisa, Jesuina Maria Ferreira Gomes entrega Relatóriu Monotorizasaun Distribuisaun Hand Tractor ba Membru Komisaun D, Deputadu Mariano Assanami Sabino. Imajen Julia Chatarina

DILI, (TATOLI) – Provedoria Direitu Ema-Nian no Justisa (PDHJ-sigla portugés) lansa relatóriu monitorizasaun  distribuisaun tratór liman ka (tratór manuál) ba munisípiu Baukau, Vikeke, Manatutu, Manufahi, Ermera, Bobonaru inklui Rejiaun Administrativu Espesiál Oekusi Ambenu (RAEOA), hatudu mosu irregularidade.

Provedora PDHJ, Jesuína Maria Ferreira Gomes, hateten Ministériu Agrikultura no Peska (MAP) kria polítika distribuisaun tratór ho objetivu ajuda agrikultór sira hodi haree ba produsaun hahán ne’ebé sustentavel, tanba durante ne’e agrikultór sira uza tradisionál, liman ka ai-suak.

“Iha implementasaun polítika ne’e iha prátika hamosu irregularidade, hanesan problema ne’ebé PDHJ identifika iha monitorizasaun hanesan laiha standar operating procedure (SOP) atu regula mekanizmu oinsá fahe hand tractor sira husi nasionál to’o suku”, tenik iha serimónia lansamentu iha salaun biblioteka PDHJ, Kaikoli, ohin.

Nia hatutan MAP atu ajuda agrikultór hodi garante seguransa ai-han no hasai produsaun, liga mós kreximentu ekonómiku ba agrikultór sira.

PDHJ mós identifika laiha sistema kontrolu ne’ebé di’ak ba distribuisaun, laiha baze dadus atu rejistu mákina sira ne’ebé sei di’ak ka aat ona.

Nune’e mós laiha koordenasaun di’ak entre estensionista suku, ladún iha funsionamentu servisu inspesaun ministériu nian.

Provedora ne’e relata tratór liman ida iha Vikeke ne’ebé grupu agrikultór sira privatiza no fa’an ba ema seluk.

“Ami husu ha MAP atu haree tanba hand tractor sira sosa uza orsamentu Estadu, nune’e tenke haree ba jestaun atu rejista hotu ne’ebé mak sei di’ak no ida aat ona. Liga mós ho kombustivel laiha tratamentu hanesan ba grupu agrikultór sira”, tenik.

Tanba ne’e provedora husu MAP iha futuru kuandu atu halo polítika hanesan ne’e presiza halo survey ne’ebé di’ak hodi identifika grupu ne’ebé merese atu simu apoiu sira ne’e no prepara mós prosedimentu ne’ebé adekuadu atu regula oinsá mekanizmu distribuisaun husi nasionál to’o munisípiu.

Inspetór Agrikultura no Peska, Octavio da Costa Monteiro, hateten relatóriu ne’e ajuda MAP oinsá atu hadi’a no halo di’ak liután buat balun ne’ebé karik naksalak no ladún di’ak.

“Rekomendasaun ne’e, nu’udar inspetór sei follow up buat balun liuhosi tékniku sira. Dadus iha maibé aprezentasaun dadus ne’e  másimu, ami sei haree fali saida mak presiza hadi’a”, dehan.

Nia hatutan, iha distribuisaun tau ona kritériu tenke iha xefe grupu ida ho nia membru mínimu 10 to’o 15 mak foin simu ekipamentu, nune’e mós tenke iha rai hodi bele uza tratór sira maibé iha prátika la’o oin seluk.

“Iha programa boot MAP mak governasaun di’ak no jestaun rekursu. Ami sei halo koordenasaun di’ak entre nasionál no mós munisípiu”, katak.

Membru Komisaun D ne’ebé trata asuntu Ekonomia no Dezenvolvimentu, Deputadu Mariano Assanami Sabino, hateten PDHJ nia servisu importante tebes liu-liu ba prevensaun.

“Husi tratór ne’ebé apoiu hodi bele reforsa agrikultura, maibé situasaun iha terrenu la la’o tuir saida mak ita hakarak”, katak.

Nia hatutan: “Nu’udar deputadu ami sei buka polítika labele tane tan apoiu gratuitu, liuhosi banku atu fó kréditu ho funan ki’ik menus porsentu ida atu bele fó apoiu ba agrikultór sira”.

Eis Ministru agrikultura ne’e akresenta atu fortifika agrikultór sira, tratór tenke konsentra iha sentru produsaun la’ós fahe ba grupu agrikultór sira.

Entretantu iha tinan 2018, PDHJ liuhosi Diresaun Fiskalizasaun no Rekomendasaun halo monitorizasaun ba polítika MAP), kona-ba distribuisaun tratór liman ka tratór manuál ne’ebé komesa husi 2004 to’o 2017.

Liuhosi monitorizasaun PDHJ haree ba aspetu governasaun di’ak no direitu ema-nian, governasaun di’ak nian haree kona-ba kontrolu ne’ebé liga ho kategoria administrasaun, haree kona-ba kontrolu implementasaun polítika no haree kona-ba parte legalidade polítika fahe tratór, enkuantu liuhosi aspetu direitu ema-nian haree liu ba direitu ema nia, sosiál no kultura.

Objetivu husi monitorizasaun ne’e atu haree kona-ba jestaun no distribuisaun tratór liman, atu haree kona-ba inventarizasaun ne’ebé MAP halo no prosedimentu ne’ebé sira uza hodi fahe tratór sira, liga ho manutensaun, kombustivel ba grupu agrikultór sira no servisu estensionista iha kada suku.

Tamba limitasaun tempu no orsamentu PDHJ foti de’it sampel iha munisípiu neen inklui RAEOA, postu administrativu hamutuk 23 no ba suku 68. PDHJ hili fatin hitu ne’e, tanba haree ba poténsia ba produsaun.

Respondente sira ne’ebé tama iha PDHJ nia monitorizasaun grupu agrikultór, responsavel grupu, responsavel MAP nivel suku, postu administrativu, munisípiu to’o nivel nasionál.

Métodu ne’ebé PDHJ halo mak entrevista, rekolla dokumentu no mós halo observasaun direta.

Iha serimónia lansamentu ne’e, PDHJ entrega relatóriu ba reprezentante membru Parlamentu Nasionál no Dirijente MAP sira.

Jornalista: Julia Chatarina

Editora: Rita Almeida

HAKEREK NO HATÁN

Please enter your comment!
Please enter your name here