Vise-Ministru Saúde Bonifácio Maukoli dos Reis. Foto António Goncalves

DILI, (TATOLI) – Vise Ministru Dezenvolvimentu Estratéjiku Saúde, Bonifácio Maukoli dos Reis, informa hahú hosi janeiru to’o fevereiru tinan ne’e, moras dengue hamate ona ema ho idade labarik na’in haat.

“Ema ne’ebé sofre moras dengue ho númeru aas iha Dili, no rezulta na’in tolu mak mate, Ermera mate ida, enkuantu Baukau la rezulta ema mate maibé iha kazu moras dengue”,  Maukoli ba jornalista sira, sesta, (22/3) iha Palásiu Governu hafoin hasoru malu ho Xefe Governu, Taur Matan Ruak.

Maukoli akresenta tempu ne’e haree ba insidénsia moras dengue sa’e maka’as, liuliu iha Dili, Ermera inklui Likisá.

Tuir Maukoli moras dengue ne’e rejista aas, tanba ambiente ne’ebé fo’er, bee nalihun arbiru, lixu barak iha fatin-fatin. Entaun ida ne’e maka bele hamoris susuk barak hodi tata ema no rezulta moras dengue, to’o ikus bele hakotu ema nia vida.

Iha fulan Marsu agora ita konsege redús ona moras ida ne’e, liuhosi aktu prevensaun.

Entretantu, atu halo prevensaun ba moras dengue, Maukoli alerta ba komunidade atu iha konsiénsia hodi halo ambiente sai moos, liuliu halo prevensaun ba bee nalihun, kalén lata ne’ebé soe arbiru, tanke presiza hamoos, iha uma laran, ropa labele habai arbiru.

Jornalista: Zezito Silva

Editora: Rita Almeida

HAKEREK NO HATÁN

Please enter your comment!
Please enter your name here