Treinamentu kona-ba abilidade hakerek no lei organiza husi ADTL. Foto TATOLI: Rafy Belo

DILI, (TATOLI) – Asosiasaun Defisiente Timor-Leste (ADTL) ho apoiu husi governu Austrália liuhusi Ajénsia Austrália ba Dezenvolvimentu Internasionál (AUSAID-sigla inglés) hakarak muda ema-nian hanoin kona-ba ema ho defisiénsia liuhusi divulgasaun informasaun iha mídia.

Ho esforsu ne’e, ADTL realiza treinamentu loron ida hodi hasa’e koñesimentu funsionáriu no membru ADTL sira kona-ba abilidade oinsá hakerek no prodús konteúdu informasaun sira tuir padraun jornalizmu nian.

“Ami hanoin mídia ne’e importante tebes i ema barak mak asesu mídia, entaun ita presiza ema ne’ebé mak hakerek di’ak, informasaun ne’ebé atrativu, bele muda mós pensamentu ema nian”, Diretór Ezekutivu ADTL, Cesario da Silva, iha edifísiu Ra’es Hadomi Timor Oan (RHTO), Lahane Orientál, ohin.

Treinamentu kona-ba abilidade hakerek eh prodús konteúdu informasaun tuir padraun jornalizmu fasilita husi jornalista Ajénsia Notisioza Timor-Leste, TATOLI.IP, nu’udar ajénsia informasaun ofisiál estadu Timor-Leste nian, Rafael Belo.

Konteúdu ne’ebé mak fasilita ba membru ADTL mak saida mak notísia no oinsá foti ángulu notísia tipu notísia (notísia todan/hard ka straight news, notísia kama’an/soft news no notísia interese umanu/feature).

Valór notísia sira hanesan importante (significance), boot (magnitude), atualidade (timelines), besik (proximity), famozu (prominence) no interese umanu (human interest) nomós elementu notísia sira hanesan faktuál, balansu, objetivu no akuradu (tékniku no sistemátiku) nune’e mós oinsá hakerek notísia ho pirámide invertida.

Inklui, oinsá téknikamente hakerek títulu (simples no konsiza, relevante, funsionál no formál), lead (lead 5W+1H, lead contras, lead interogrativu, lead eksklamativu, lead deskritivu, lead narrativu, lead paródia, lead figurative no lead diálogu) nomós funsaun lead (atrativu, introdutivu, korelativu no kredivel).

Nune’e mós halo simulasaun no prátika hakerek inklui aprezenta rezultadu hakerek notísia ne’ebé partisipante sira hakerek hafoin partisipa treinamentu kona-ba oinsá hakerek notísia tuir padraun jornalizmu ne’e perante partisipante seluk.

Iha biban hanesan, ADTL fasilita mós treinamentu kona-ba lei ne’ebé fasilita husi jurista timoroan, Júlio da Silva, kona-ba oinsá kria lei foun, dekretu lei no amandamentu ba dekretu lei ida ba membru ADTL sira hotu, husi nasionál no munisípiu.

“Iha treinamentu dadauk ne’e hakarak iha lei espesífiku ba ema ho defisiénsia. Maibé fila fali koñesimentu funsionáriu ne’e sei menus, liliu oinsá atu kria lei, mekanizmu ne’e hanusá”, katak Cesario.

Ho kestaun ne’e, Cesario dehan ninia parte bolu jurista sira mai fahe informasaun atu bele entende oinsá advoka lei no sei mak bele halo lei foun, no semak halo amandamentu ba lei ne’ebé la fó vantajen ba ema ho defisiénsia.

Membru ADTL ne’ebé partisipa iha treinamentu loron ida ne’e mak RHTO, ETBU (East Timor Blind Union), Klibur Domin no seluk tan alende nasionál no mós munisípiu sira hanesan Aileu, Baukau no Vikeke.

Tuir planu, ADTL sei realiza mós atividade idéntika ho programa seluk hanesan kona-ba oinsá halo advokasia liga ho asuntu orsamentu sira no atividade seluk tuir nesesidade organizasaun nian.

Jornalista: Rafy Belo

Editora: Rita Almeida

HAKEREK NO HATÁN

Please enter your comment!
Please enter your name here