Tribunál Distritál Dili. Imajen/Dok.Tribunais.tl

DILI, (TATOLI) – Konsellu Koordenasaun Justisa reformula ona lala’ok  no funsionamentu tribunál movel hodi hakbesik justisa ba povu liuhosi  atividade julgamentu ba kazu sira iha territóriu.

Ministru Justisa, Manuel Cárceres da Costa, ne’ebé lidera enkontru ho Konsellu Superiór Justisa kompostu Prezidente Tribunál Rekursu, Prokuradór Jerál Repúblika, Defensoria Públika, Diretór Nasionál Polísia Servisu Investigasaun Kriminál (PSIK), reprezentante Advogadu Timor-Leste.

Nia dehan durante tinan hira kotuk ho apoiu Programa Dezenvolvimentu hosi Nasaun Haklibur Sira (UNDP-sigla inglés) implementa ona julgamentu movel iha territóriu maibé seidauk la’o di’ak.

“Ohin Prezidente Tribunál Rekursu dehan la’o ona, más la’o neineik ne’ebé ami reformula lala’ok ne’e atu la’o mais organizadu”, afirma ministru ba jornalista sira iha Kaikoli, ohin.

Durante ne’e prosesu julgamentu dala-ruma atraza tanba ekipa juis, prokuradór no defensór públiku la la’o hodi impede prosesu julgamentu bainhira to’o iha fatin.

“Kuandu to’o data julgamentu ne’e ekipa hosi juis, defensoria públika no prokuradór tenke la’o hamutuk ba fatin julgamentu atu aselera prosesu”, tenik.

Polítika governu da-ualu sei hadi’a di’ak liután setór justisa hodi hakbesik liután ba povu iha baze.

“Duke arguidu, sasin no vítima maka tenke mai tribunál di’ak liu ema na’in tolu maka ba hasoru sira”, realsa liután.

Governante rekoñese durante ne’e prosesu julgamentu la neineik, tanba lori arguidu hosi munisípiu ida tuir julgamentu iha munisípiu seluk.

“Lori fali ema hosi Suai ba halo julgamentu iha Same, labele lori fali ema hosi Lospalos mai halo fali julgamentu iha Manatutu, julgamentu movel ne’e ho intensaun atu hakbesik justisa ba povu”, hatete tan.

Governante afirma ba tinan 2019 UNDP sei la apoia tan governu hodi implementa tribunál movel, tanba ne’e ministériu justisa sei responsabiliza ba atividade ne’e.

Prosesu julgamentu movel sei implementa fali iha tempu badak depois prezidente tribunál rekursu fornese fali mapa julgamentu ba ministériu justisa hodi distribui ba defensoria públika no ministériu públika

“Prezidente Tribunál Rekursu ohin hatete semana ida ka rua nia laran sei haruka fali mapa julgamentu mai”, dehan nia.

Entretantu, Timor-Leste iha ona juis 30 resin no prokuradór 30 resin.

Jornalista: Agapito dos Santos

Editora: Rita Almeida

HAKEREK NO HATÁN

Please enter your comment!
Please enter your name here