Foto SS.

DILI, (TATOLI) – Prezidente Institutu Nasionál Seguransa Sosiál, Longuinhos Armando, hatete funsionáriu ne’ebé rejista ona iha Institutu Nasionál Seguransa Sosiál (INSS) no iha ona Númeru Identidade Seguransa Sosiál (NISS) bele hatene sira-nia nominál osan ne’ebé ko’a ba Seguransa Sosiál (SS).

NISS ne’e bele hetan liuhusi instituisaun ka empreza ne’ebé funsionáriu ida-idak serbisu ba, tanba bainhira atu ko’a osan ne’e bazeia ba deklarasaun remunerasaun ne’ebé kompañia ka instituisaun ida fó ba INSS.

“Deklarasaun remuneratóriu ne’e fulan-fulan empregadór sira hato’o mai ami para ami bele hatama iha ami-nia baze dadus. Iha deklarasaun remuneratóriu iha kedan Númeru Identidade Seguransa Sosiál, ne’ebé funsionáriu ida hakarak hatene nia númeru ida ne’e iha ministériu iha tiha ona”, Longuinhos afirma iha Kaikoli, ohin.

Aléinde ne’e atubele hatene montante osan ne’ebé ko’a ba SS maka bele bá diretamente iha INSS. Bainhira empregadu ida lori identidade hodi hatudu iha SISS ne’e nia naran mosu kedan ho nia númeru identidade hira no iha ne’ebá kompletu.

Longuinhos Armando dehan implementasaun SS kada fulan funsionáriu husi empreza públika no privada ko’a sira-nia osan porsentu haat no instituisaun públika no privada ko’a porsentu neen, nune’e kada fulan empregadu ida nia osan tama iha INSS ne’e porsentu 10.

“Osan sira ne’e rai iha Institutu Seguransa Sosiál hodi jere. Agora, sira atu hatene katak sira-nia osan iha ne’ebé? Funsionáriu ida-idak, ami tama ona iha ita-nia sistema ne’e naran Sistema Informátika Seguransa Sosiál”, katak.

Nia dehan funsionáriu ida-idak iha ona NISS ne’ebé funsionáriu privadu ka públiku rejista, entaun nia atu hatene nia osan ne’e bele tama iha NISS.

Tanba ne’e maka husu ba empregadu sira ne’ebé tama ona ba lista SS lalika ta’uk. “Ita-boot sira-nia osan la lakon, Institutu Seguransa Sosiál jere ita-boot nia osan ne’e rai hela ba futuru para aban-bainrua ita-boot sira idade, la produtivu ona, Institutu Seguransa Sosiál selu fali ita-boot sira tuir osan ne’ebé durante ne’e  ko’a”, afirma.

Longuinhos akresenta NISS ne’e estabelese husi INSS tanba iha hanoin ida katak funsionáriu privadu ou públiku ne’ebé rejista ona iha SS tenke iha kartaun ida, maibé agora daudaun institutu estuda hela atu hasai kartaun ida ne’ebé ema própria maka asesu.

“Ami hanoin hela oinsá maka Númeru Identidade Seguransa Sosiál ita tenke hamosu kartaun ida para aban-bainrua sira hakarak complaint (reklama) mai sira lori de’it kartaun ne’e”.

Ho ida ne’e institutu sei estuda tanba kartaun ne’ebé relasiona ho osan nune’e labele hasai arbiru tanba tenke sees husi duplikasaun, ema hotu labele asesu maka tenke hasees husi buat sira ne’e no só ema própriu maka bele.

Longuinhos afirma osan sira ne’ebé banku ko’a ne’e tau iha konta bankária SS depois maka sira jere osan ne’e, aban-bainrua funsionáriu ida reklama maka SS selu nia reklamasaun ne’e.

Hatán ba preokupasaun sobre SS tanba daudaun ne’e balun seidauk hatene didi’ak nia implementasaun maka institutu presiza halo sosializasaun para ema bele komprende didi’ak tanba balun hanoin katak osan ida ne’e ko’a ba Governu.

“Mas lae, osan ne’e ita-boot sira-nian rasik ne’ebé Governu hanoin katak aban-bainrua depois de ita-boot sira serbisu la produtivu ona nia tenke moris ho dignu nafatin, tanba ne’e maka estabelese instituisaun ne’e hodi jere ita-boot sira-nia osan para aban-bainrua tama ona ho idade reforma nesesidade loroloron la’o nafatin”.

Sobre funsionáriu ida ne’ebé serbisu, maibé nia para tiha tanba daudaun ne’e sira-nia osan ko’a ona, Longuinhos hatán katak bainhira empregadu ida para nia serbisu iha empreza maka sistema iha INSS ne’e taka tiha lai, tanba fulan-fulan osan la tama ona depois nia hetan fali serbisu iha kompañia seluk maka empreza ne’e tenke bá rejista fali nia empregadu ne’e iha institutu no husi institutu hein loke de’it ona nia NISS ne’e hodi kontinua ko’a fali osan ba SS. Tanba ne’e maka NISS ne’e labele lakon.

Entretantu funsionáriu ida para husi serbisu no hakarak reklama nia SS, tuir lei tenke tinan lima lai maka halo reklamasaun. “Tinan lima maka nia sei iha direitu halo reklamasaun, seidauk to’o tinan lima labele lai. Bainhira ema mate bele halo reklamasaun”.

Nia salienta bainhira funsionáriu ida foin tama serbisu depois liu fulan ida ka rua mate, nia iha direitu. “Ezemplu, ohin nia rejistu loraik hatama iha sistema aban nia mate, nia iha direitu atu hetan saláriu (báziku) fulan tolu nian. Ida ne’e maka iha hakarak dehan fó dignidade ba ema ida”.

Kona-ba funsionáriu ne’ebé reforma ona hodi hetan nia direitu ba SS ne’e konforme ba nia saláriu tanba ko’a porsentu haat lahanesan no porsentu neen ne’ebé empregadór ajuda ba mós diferente. Bainhira saláriu boot tinan naruk serbisu hetan boot liu no saláriu ki’ik tinan lima de’it lahanesan.

Bainhira atu hetan pagamentu liuhusi SS nian, ezemplu subsídiu maternidade nian, bainhira partu ona bele lori dokumentu ba INSS no husi institutu prepara dokumentu no hasai gia ida haruka ba banku no halo pagamentu bazeia ba pedidu ne’ebé halo.

“Kona-ba pensaun mate nian, nia funsionáriu, nia feen tenke mai halo reklamasaun iha ne’e depois ami fó nia rekizitu, tékniku sira analiza tiha ami hasai gia ida haruka ba iha banku para halo pagamentu”.

Bainhira ema ida klosan maka mate, inan-aman maka reklama no bainhira inan-aman laiha iha maun-alin ruma maibé tenke iha deklarasaun katak sira maun-alin duni. Bainhira funsionáriu ida mate maibé iha oan, mas inan laiha entaun oan maka iha direitu maski ida mate ne’e nia inan-aman iha.

Tuir pájina ofisiál SS nian hatete SS hanesan poupansa forsada ne’ebé investe ba futuru. Lala’ok ko’a ka kontribuisaun ba SS depende ba valór saláriu ne’ebé simu.

Ezemplu, ema ho saláriu $500 nia sei kontribui 4%=$20, instituisaun ne’ebé fó serbisu sei kontribui 6%=$30. Saláriu $115 nia sei kontribui 4%=$4.60, instituisaun ne’ebé fó serbisu kontribui 6%=$6.90.

Direitu sira ne’ebé hetan depois de kontribui no kumpre ona prazu ka durasaun kontribuisaun sira hanesan subsídiu parentalidade hanesan subsídiu maternidade (sei benefisia ba inan-feton sira), paternidade (sei benefisia ba aman sira), subsídiu adosaun (adota labarik mós sei benefisia ba inan-aman hakiak).

Subsídiu risku klínika durante isin rua (sei benefisia ba inan-feton ne’ebé problema bainhira partu, subsídiu interrupsaun gravidés (sei benefisia ba inan-feton sira ne’ebé abortu).

Subsídiu hirak ne’e, haktuir iha prosedimentu legál Lei Rejime Seguransa Sosiál presiza de’it kontribui fulan neen ba leten sei hasoru situasaun refere bele asesu ba subsídiu sira refere ba SS.

Subsídiu mate/despeza funerál bele asesu husi família matebian ka ema sira ne’ebé la’ós família, maibé sira mak hakoi matebian/traballadór ne’e. Subsídiu ba ida ne’e sei la boot liu husi traballadór ka matebian ne’e nia saláriu fulan tolu.

Aleinde simu subsídiu traballadór sira mós bele asesu ba pensaun hamutuk haat mak pensaun sobrevivénsia, invalidés absoluta, invalidés relativa (pensaun 3 ne’e kontribui de’it fulan 18 bele asesu ona ba pensaun sira refere no seluk mak naran pensaun valise ka ikus (reforma) tenke kontribui tinan lima no traballadór ne’e bele asesu ba pensaun refere kuandu atinje ona idade 60 ba leten, nia sei simu pensaun ne’e kada fulan to’o nia mate.

Jornalista: Maria Auxiliadora

Editora: Rita Almeida

HAKEREK NO HATÁN

Please enter your comment!
Please enter your name here