Sekretáriu Estadu, Maria José da Fonseca Monteiro. imajen SEII

DILI, (TATOLI) – Estadu Timor-Leste liuhosi Sekretária Estadu Igualdade no Inkluzaun (SEII) aprezenta prioridade tolu hanesan sistema protesaun sosiál, asesu ba servisu públiku, no infraestrutura sustentável ba igualdade jéneru no hakbiit feto no labarik feto iha eventu altu kona-ba feto iha podér  ne’ebé lidera hosi Prezidente Asembleia Jerál iha Novaiorke iha loron 14 marsu 2019.

Aprezentasaun ne’e akompaña hosi reprezentante permanente misaun Timor-Leste nian ba Organizasaun Nasaun Haklibur Sira (ONU-sigla inglés) iha ámbitu soru-mutu entre membru governu, observadór hosi Asembleia Jerál, reprezentasaun Governu, setór privadu no  sosiedade sivíl hodi identifika bareira ne’ebé impede partisipasaun no lideransa feto no pratika di’ak hodi aselera empoderamentu feto sira.

Tuir komunikadu ne’ebé TATOLI asesu hosi SEII hatete intervensaun governante ne’e mós aprezenta progresu  seluk ne’ebé Timor-Leste atinje maka programa estrada ba dezenvolvimentu (R4D), Programa Nasionál Dezenvolvimentu Suku (PNDS) no infraestrutura sustentável ba igualdade jéneru no hakbiit feto no labarik feto no mós ba ema ho defisiénsia.

“Programa sira ne’e hadi’a ona padraun moris feto, mane, labarik feto no labarik mane iha área rurál”, katak Maria José da Fonseca Monteiro de Jesus.

Alende ne’e, aprezenta mós kona-ba polítika seguransa sosiál ne’ebé hahú implementa  iha instituisaun públika no privada, nune’e mós asesu ba saúde iha área rurál hodi rezulta redusaun taxa mortalidade inan no labarik inklui polítika implementasaun edukasaun inkluziva no polítika fila hikas ba eskola.

Entretantu iha loron 12 fulan marsu iha Novaiorke iha diskusaun meza kabuar ida  kona-ba futuru lideransa feto, Governante mós aprezenta progresu partisipasaun feto iha Parlamentu Nasionál atinje ona porsentu 40 no porsentu lima feto asume kargu nu’udar Xefe Suku, iha funsaun públika partisipasaun feto ho porsentu 35.

Nia hatudu ezemplu maka prátika di’ak ne’ebé komisaun funsaun públika ho governu liuhosi kriasaun dekretu lei ba rejime konkursu, selesaun no rekrutamentu ba pesoál administrasaun públika, promosaun rejime jerál karreira servidór públiku no dekretu lei kona-ba distinsaun no prémiu iha administrasaun públika ne´ebé fó preferénsia ba feto bainhira iha kualifikasaun ne’ebé hanesan entre feto no mane.

Jornalista: Agapito dos Santos

Editora: Rita Almeida

HAKEREK NO HATÁN

Please enter your comment!
Please enter your name here