Membru Parlamentu Nasional. Imajen/dok.TATOLI

DILI, (TATOLI) – Deputadu Bankada Partidu Demokrátiku (PD), Adriano do Nascimento, husu Ministériu Obra Públika (MOP) atu haree kanalizasaun bee, tanba udan foin daudaun halo inundasaun iha fatin-fatin.

“Ministru sei bele halo avaliasaun kona-ba drenajen sira ne’e, drenajen liga ho buat ne’ebé ita halo daudaun, keta iha fallansu tékniku ruma ne’ebé bee halo falla tomak iha sidade”, hatete deputadu Adriano iha intervensaun ba plenária segunda (18/3).

Deputadu bankada hosi partidu Frente Revolusionária Timor-Leste Independente (FRETILIN), Fabião de Oliveira, hateten loron hirak liubá inundasaun ne’ebé mak kuaze mosu iha kapitál no mós munisípiu balun no afeta tebes ba komunidade nia saúde.

“Tanba saida mak inundasaun ne’e to’o tinan 10 ita la rezolve, tanba laiha planu urbanu no laiha ordenamentu, osan gasta maibé rezultadu laiha, tinan-tinan mak komunidade halerik ba inundasaun iha ema nia hela fatin”, afirma.

Hatan ba kestaun ne’e, deputada bankada governu hosi partidu Kongresu Nasionál Rekonstrusaun Timor (CNRT-sigla portugés), Carmelita Caetano Moniz, realsa planu sistema drenajen iha Dili laran tomak hahú kedan iha V Governu Konstitusionál maibé agora sei hein Tribunál Rekursu hasai vistu preevia.

Em felizmente Tribunal das Contas seidauk tau vistu to’o agora ba projetu implementasaun drenajen  iha Dili laran tomak ho totál milliaun $20. Tanba ne’e hein ba Tribunál Rekursu hasai vistu preevia, hafoin bele halo kontratu hodi halo sistema drenajen iha Dili laran tomak”, katak.

Ministru Reforma Lejislativa no Asuntu Parlamentár, Fidelis Leite Magalhães, hateten problema ne’e presiza halo sensibilizasaun boot ba populasaun atu redús kestaun ne’ebé kontribui ba inundasaun.

“Tuir enkontru Governu, problema ida mak falta konsiénsia, entaun ita nia populasaun rasik kontribui hanesan so’e lixu arbiru, tanba ne’e esforsu sira ne’ebé mak kontribui atu muda mentalidade populasaun nian importante tebes”, dehan.

Jornalista: Julia Chatarina

Editora: Rita Almeida

HAKEREK NO HATÁN

Please enter your comment!
Please enter your name here