Madre Guilherminha Marçal, FdCC. Imajen Antonio Goncalves

DILI, (TATOLI) – Movimentu Revolusaun Karáter ba Futuru (MRKF), realiza diálogu no reflesaun ba kazu hamate joven na’in tolu iha Kuluhun de Baixo, Kristu Rei, ne’ebé akontese iha loron 18 novembru 2018 liuba, ho tema “Diálogu no reflesaun nu’udar dalan ida dignu no solusaun ba parte hotu”.

Diálogu no reflesaun ne’e ho objetivu oinsá família matebian ho Estadu no Governu Timor-Leste buka solusaun pasífiku no konsensuál ba vítima, faluk no oan ki’ak sira ne’ebé maka afeta hosi kazu refere.

“Dezde tinan kotuk ami halo aprosimasaun hasoru malu ho família vítima sira no rona sira nia halerik, tanba ne’e maka lori ami hala’o eventu ida ne’e”, Prezidente MRKF, Me. Guilherminha Marçal, FdCC, ba jornalista sira iha fatin Diálogu, Kongregasaun Madre Canossiana, Balide, segunda ne’e.

Nia dehan eventu ne’e hanesan serbisu ida ne’ebé maka atu tulun Estadu rona família sira nia halerik, nune’e bele hola medida adekuada hodi tau matan ba vítima sira ne’ebé alejadu iha parte oi-oin atu halo tratamentu saúde ho dignu.

Objetivu seluk hosi atividade ne’e, nia dehan oinsá atu fó hanoin ba Estadu atu tau matan ba faluk no ki’ak sira hosi akontesementu refere.

Maski nune’e, Madre Guilherminha dehan nia tau fiar nafatin ba instituisaun Polísia Nasionál Timor-Leste (PNTL), tanba ema ne’ebé halo krime ne’e la’ós reprezenta PNTL maibé individu.

“Ami nia rekomendasaun katak bainhira halo rekrutamentu ba membru PNTL presiza halo avaliasaun ba membru PNTL nia atitude no presiza reforma mós lei orgánika PNTL nian katak ida ne’ebé di’ak la’o nafatin no ida ne’ebé ladi’ak tenke muda, liu-liu prevene lori arma ba uma no ba futu manu fatin”, nia rekomenda.

Entretantu, reprezentante família vítima, António da Costa, husu ba Estadu atu fó kompensasaun ba vítima no família vítima liu-liu faluk no oan ki’ak sira nomós husu apoiu halo tratamentu saúde ba vítima sira ne’ebé sei moris ho dignu.

Aleinde ne’e, nia dehan labele promete atu bele rekonsilia fali ho família suspeitu ka lae, tanba ida ne’e presiza tuur hamutuk ho família vítima sira seluk atu deside.

Nune’e mós, reprezentante Komandante Jerál PNTL, Superintendente Orlando Gomes, katak liga ba justisa, PNTL entrega ba Ministériu Públiku no Tribunál atu prosesa suspeitu sira.

Hosi PNTL ninian, nia dehan sei serbisu hamutuk ho parte Klínika Saúde PNTL no Ministériu Saúde para kontinua tau matan ba vítima sira nia saúde.

“Devér no responsabilidade morál hosi PNTL maka ita iha klínika PNTL, oinsá serbisu hamutuk ho Ministériu Saúde para bele tau matan di’ak liu ba vítima sira”, Xefe Departamentu Justisa PNTL ne’e tenik.

Entretantu, espoza Prezidente Repúblika, Cidalia Nobre Guterres, hateten eventu ne’e importante teb-tebes atu hakbesik liu fali família vítima sira ho autoridade sira ne’ebé liga ba akontesementu ne’e.

Nia agradese no apresia ba família vítima, maske hasoru situasaun ne’ebé maka difísil maibé família sira fuan boot nafatin no pasiénsia hasoru.

“Situasaun ida ne’e loloos labele akontese, maibé akontese ona entaun oinsá buka dalan loos ka justu ba kazu ida ne’e”, Cidália tenik.

Nia katak tan sei hato’o preokupasaun hosi vítima no família vítima ba Prezidente Repúblika no nia sei buka dalan atu liga ho entidade relevante sira para tau importánsia ba problema ne’e.

Nia promete iha tempu tuir mai hosi Gabinete Espoza Prezidente Repúblika sei halo soru-mutu ho vítima no família vítima sira atu bele ko’alia di’ak liu-tan ba trajédia Kuluhun.

Jornalista: Xisto Freitas

Editora: Rita Almeida

HAKEREK NO HATÁN

Please enter your comment!
Please enter your name here