Komisaun G ne’ebé trata asuntu Edukasaun, Juventude, Kultura no Sidadania, PN halo audiénsia ho Sekretáriu Estadu Juventude no Desportu (SEJD) no mós Komisaun Reguladór Arte Marsiál (KRAM), hodi hatene kona-ba atividade KRAM durante ne'e. Imajen Egas Cristovão

DILI, (TATOLI) – Komisaun G ne’ebé trata asuntu Edukasaun, Juventude, Kultura no Sidadania, Parlamentu Nasionál konvida Sekretáriu Estadu Juventude no Desportu (SEJD) no Komisaun Reguladór Arte Marsiál (KRAM), hodi hatene kona-ba atividade KRAM durante ne’e.

Prezidente Komisaun G, deputada Albina Marçal Freitas, hateten nu’udar reprezentante povu presiza rona atividade saida de’it mak durante ne’e halo.

“Ami apresia tebes sira nia esplikasaun, KRAM halo duni atividade tuir kompeténsia ne’ebé mak hatuur iha lei, soke durante ne’e ladún apár no hanoin katak atividade paradu maibé atividade husi KRAM la’o hela”, tenik ba jornalista sira iha uma fukun, ohin.

Nia hatutan: “Ami bolu sira atu mai fó informasaun tanba foin lais ne’e fulan hirak liubá akontese buat barak iha rai-laran relasiona ho arte-marsiál, entaun ita presiza husu ba sira kona-ba asuntu ne’e”.

Kona-ba reativa atividade arte-marsiál, tuir deputada ne’e presiza haree desizaun polítika iha Governu, tanba ezekutivu sira mak sei foti desizaun oinsá atu haree organizasaun sira ne’e.

Parte seluk Sekretáriu Estadu Juventude no Desportu, Nélio Isaac, hateten KRAM  nia servisu atu halo fiskalizasaun no fó rekomendasaun ba Governu kona-ba asuntu sira ne’ebé iha relasaun ho atividade arte-marsiál.

“Ami aprezenta preokupasaun sira ba membru Komisaun G sira no sira entende ona. Espera katak tempu badak polítiku sira, liu-liu desizaun ba interese Estadu sira sei pronúnsia lala’ok ne’ebé mak akontese iha arte-marsiál”, katak.

Hodi dehan: “Kona-ba arte-marsiál sira ne’ebé mak taka, ne’e la’ós KRAM atu ko’alia, KRAM atu fasilita de’it arte-marsiál sira ne’ebé eziste ho legal no buka oinsá mak sira tuir dalan ne’ebé sira komprometidu iha vizaun estatutu KRAM nian”, katak.

Governante ne’e akresenta problema krime ne’ebé akontese iha rai-laran presiza buka nia fukun. “Sei agora ita taka mós sei nafatin, tanba ne’e la’ós kestaun tenke loke ou taka maibé tenke buka loloos tanbasá”.

Nia mós dehan arte-marsiál la-taka tomak, balun sei loke hela, agora oinsá mak grupu arte legál sira bele abranje liras iha eskola-eskola, ho objetivu kona-ba prestasaun desportivu nian, hanesan iha eskola para hanoin kompetisaun desportiva eskolár.

Entretantu iha loron 2 jullu 2013, Governu liuhosi Konsellu Ministru estraordinária, hasai rezolusaun Governu númeru 16/2013 kona-ba estinsaun grupu arte-marsiál no determina estinsaun ba grupu PSHT, KERA SAKTI no KORK, hodi bandu totál kontinuasaun ba kualkér atividade.

Rezolusaun ne’e define medida lubun ida ne’ebé atu hodi estabelese hikas fali orden públika no hakmatek iha sosiedade, ne’ebé hetan ameasa husi hahalok hirak ne’ebé mak grupu ne’e halo.

Nune’e mós iha PN aprova iha loron 6 marsu 2017 no Prezidente Repúblika promulga iha 12 abril 2017, lei númeru 5/2017 de 19 de abril kona-ba rejime jurídiku kona-ba  prátika de arte-Marsiál, rituál sira, arma branka, rama ambon no kinta alterasaun ba kódigu penál.

Lei ne’e mai hodi kriminaliza prátika no ezersísiu ilísita arte-marsiál no prátika rituál sira iha kontestu arte-marsiál.

Bainhira prátika husi elementu sira F-FDTL, forsa seguransa, majistradu sira, ofisiál justisa, funsionáriu estadu no ajente administrasaun públika ne’ebé responsavel ba prevensaun no represaun ba atividade ilísita sira ne’ebé ko’alia iha lei ne’e ho pena prizaun tinan 6 to’o 10.

Lei ne’e rasik hafoin públika no la ho sosializasaun ne’ebé di’ak ba povu maibé alerta maka’as liu iha atuasaun.

Jornalista: Julia Chatarina

Editora: Rita Almeida

HAKEREK NO HATÁN

Please enter your comment!
Please enter your name here