Ministru Justisa Manuel Cárceres da Costa Imajen:Egas Cristovao

DILI, (TATOLI) – Komisaun organizadora hanesan Ministru Justisa, Manuel Cárceres, ho Prezidente Komisaun Funsaun Públika (KFP), Faustino Cardoso, ho nia ekipa konvida Primeiru-Ministru (PM), Taur Matan Ruak, atu halo abertura ba komemorasaun loron Funsaun Públika ne’ebé sei monu iha 15 marsu 2019.

“Ami mai hamutuk ho Prezidente Komisaun Funsaun Públiku atu konvida, disponibilidade Primeiru-Ministru hodi halo abertura ba komemorasaun loron funsaun públika nian ne’ebé sei akontese iha 15 jullu”, Ministru Justisa, Manuel Cárceres, ba jornalista sira hafoin hasoru malu ho PM iha Palásiu Governu, ohin.

Tuir Cárceres tinan ne’e komisaun organizadór monu ba Ministériu Justisa hamutuk ho Komisaun Funsaun Públiku atu organiza atividade komemorativa ba kintu aniversáriu ba FP nian ne’ebé sei halo abertura hosi Xefe Governu iha Ministériu Finansa.

“Ami husu Primeiru-Ministru atu hato’o nia intervensaun ba membru governu no dirijente sira hosi instituisaun governu nian, hanesan Diretór Jerál ka Diretór Nasionál sira inklui kargu xefia sira hosi instituisaun Estadu sira iha momentu loron importante ba Funsaun Públika nian”, solisita.

Depois intervensaun hosi PM, nia sei kuda mós ai-horis ho simbolikamente iha resintu Ministériu Finansa.

Tuir ajenda iha loro-kraik kedan, kada ministériu fahe ba fatin tolu hodi kontinua kuda ai-oan, dahuluk maka hahú hosi tasi ibun embaixada Xina to’o otél Arbiru Beach, daruak; hahú hosi ponte Komoro foun to’o mota-ulun no ikus maka; hosi fatu-ahi to’o Akanunu.

“Sim, Primeiru-Ministru iha disponibilidade atu halo abertura ba komemorasaun ba loron Funsaun Públiku nia”, afirma.

Iha loron hanesan, hahú halo atividade desportiva, hanesan tebe bola salaun, voleibol feto ho mane, basquetebol no seluk tan atu funsionáriu sira bele konsolida sira nia solidariedade ba malu hodi komemora loron FP.

Nune’e mós iha atividade kompetisaun múzika, doasaun ran, limpeza jerál no jornada istória inklui sei taka ho misa agradesimentu.

Jornalista: Zezito Silva

Editora: Rita Almeida

HAKEREK NO HATÁN

Please enter your comment!
Please enter your name here