Prezidente Parlamentu Nasionál, Arão Noé de Jesus da Costa Amaral. Imajen TATOLI/António Gonçalves

DILI (TATOLI) – Maske kompleta ona tinan ida akordu  delimitasaun Fronteira Marítima  (FM) entre Estadu Timor-Leste ho Austrália (6 Marsu 2018-2019), maibé to’o oras ne’e, Parlamentu Nasionál (PN) seidauk hetan dokumentu kona-ba retifikasaun husi Governu. 

“Governu seidauk aprezenta formalmente dokumentu mai Parlamentu atu Ratifika. Tuir informasaun husi Governu katak, presiza harmonizasaun balun ne’ebé presiza harmoniza, altera no hadia, hodi vinkula iha área sira ne’ebé agora sai Timor-Leste nian, ne’ebé uluk hanesan área konjunta Austrália no Timor-Leste”, informa  Prezidente Parlamentu Nasionál (PPN), Arão Noe de Jesus, ba jornalista sira, ohin, iha resintu uma fukun PN.

Arão Noe esplika katak, kuandu Delimitasaun Fronteira Marítima tama ona em vigor, área sira ne’ebé tama Timor-Leste nian tenke halo lejislasaun para proteje atividade sira ne’ebé hala’o iha Tasi Timor, liu-liu iha área Timor-Leste nian tanba ne’e mak presiza ajusta lei balun.

“Ho tinan ida ona, Governu seidauk informa mai. Hein katak, Governu bele konklui lalais serbisu atu nune’e bele aselera ratifikasaun hodi ita nia direitu kompletu”,  Arão hateten.

Nia hatutan, kuandu tratadu asina ona no kompromissu iha ona, maka  entre nasaun rua aserta sira nia programa no lejislasaun sira atu nune’e bele kobre atividade sira iha tasi ne’ebé antes ne’e hanesan área konjunta.

Iha loron 15 Fevereiru 2018, Konsellu Ministru aprova testu akordu delimitasaun fronteira Marítima Timor-Leste ho Austrália hodi fó kompeténsia ba Ministru Adjuntu Primeiru-Ministru ba Delimitasaun Fronteira, Hermenegildo Pereira iha VII Governu lori Estadu nia naran, hodi bele asina akordu ne’e.

Iha loron 6 Marsu 2018, Ministru Hermenegildo Pereira, reprejenta Estadu Timor-Leste ho Ministra Negósiu Estrangeiru Austrália, Julie Bishop representa Estadu Austrália, asina tratadu Fronteira Marítima iha Kuartél Jerál Organizasaun Nasoen Unida (ONU) iha Novaiorke ho sasin mak Sekretáriu Jerál ONU, António Guterres no Prezidente Komisaun Konsiliasaun, Embaixadór Peter Taksøe-Jensen.

Jornalista: Julia Chatarina

Editór: Francisco Simões

HAKEREK NO HATÁN

Please enter your comment!
Please enter your name here