Sekretáriu Estadu Formasaun Profesionál no Empregu (SEFOPE), Julião da Silva. Imajen/Egas Cristovão

DILI, (TATOLI)- Sekretáriu Estadu Formasaun Profisionál no Empregu (SEFOPE)  tenke halo esforsu maka’as hodi hadi’a sistema baze dadus hodi identifika merkadu traballu iha rai-laran.

Sekretáriu Estadu Formasaun Profisionál no Empregu, Julião da Silva, hatter, husi esforsu hadi’a sistema baze dadus ne’e mak bele identifika merkadu traballu nia nesesidade halai liu ba área saida. Nune’e, SEFOPE forma ema bazea nesesidade merkadu.

Ba jornalista sira, ohin, iha Dili, Sekretáriu Estadu Julião da Silva, afirma katak, iha tinan 2019, SEFOPE serbisu hamutuk ho parseiru balun hodi foku hela aselera ba baze dadus ne’e.

“Baze dadus ida tenke di’ak para ita identifika Timoroan hotu ho nia kualifikasaun iha área saida”, hateten Julião da Silva.

SEFOPE mós kontinua forma joven sira ho kualifikadu depois halo negosiasaun ho setór privadu  iha rai-laran, oinsá maka bele emprega Timoroan sira ne’e para hetan oportunidade serbisu.

Kona-ba númeru dezempregu iha Timor-Leste, Julião dehan,  bazea ba  dadus anteriór hadudu dezempregu ho porsentu 11.

“Espera tinan ne’e ami prevee fali orsamentu ba 2020 para bele inklui ona ho orsamentu uitoan atu haruka ema halo peskiza filafali hodi hatene númeru dezempregu nia persentajen ne’e oinsá ona”,  tenik Julião da Silva .

Tuir rezultadu peskiza  kona-ba Forsa Traballu (PFT) iha Timor-Leste iha tinan 2013 nian hatudu katak, populasaun sira ne’ebé ekonomikamente ativu kompostu ema empregadu no dezempregadu hamutuk na’in-213,000, ne’ebé tradús ba partisipasaun forsa traballu ho taxa hamutuk 30.6%. Ema hamutuk na’in-189,800 husi forsa traballu mak empregadu.  Ema empregadu difini hanesan sira ne’ebé serbisu ba pagamentu ka profitabilidade ruma.

Haree ba proporsaun empregu ba populasaun hatudu katak iha 27.3% de’it husi populasaun (tinan 15 ba leten) mak empregadu iha tinan 2013.   Iha tempu ne’ebé hanesan, ema hamutuk-na’in 23,400 bele klasifika hanesan dezempregadu, katak sira laiha serbisu durante períodu referensia peskiza nian, maibé disponivel no ativamente buka hela serbisu.

Jornalista : Maria Auxiliadora 

Editór: Francisco Simões

HAKEREK NO HATÁN

Please enter your comment!
Please enter your name here