Uma Fukun Parlamentu Nasionál. Imajen/Espesiál

DILI, (TATOLI) – Deputada Bankada Governu hosi partidu Kongresu Nasionál Rekonstrusaun Timor (CNRT-sigla portugés), Fernanda Lay, fó hanoin ba ezekutivu sira atu rejistu simcard (kartaun ba númeru kontaktu) telemóvel ne’ebé sei termina iha marsu.

“Ha’u fó hanoin kona-ba rejistu  simcard, agora ita iha ona marsu tuir promesa husi Ministru Transporte no Komunikasaun ne’ebé iha fulan ne’e sei taka rejistu, para evita ema anónima manda mensajen arbiru”, tenik nia iha plenária, tersa ne’e. Nia dehan enseramentu ba rejistu ne’e divia hotu antes.

Hatan ba kestaun  ne’e, Sekretáriu Estadu Komunikasaun Sosiál, Merício Juvenal dos Reis Akara, ne’ebé reprezenta Governu hatete hato’o ona ba Ministru Transporte no Komunikasaun, José Agustinho da Silva, hodi rezolve iha tempu badak.

“Governu sempre fó atensaun ba preikupasaun sira husi membru Parlamentu Nasionál. Ami sei transmite ba ministériu relevante atu fó atensaun ba asuntu sira ne’ebé sai preokupasaun”, katak.

Entretantu, governu liuhosi Autoridade Nasionál Komunikasaun (ANC-sigla portugés), halo ona estensaun ba rejistu simcard ne’e ba dala tolu ona.

Timor-Leste oras ne’e dadauk iha ona operadór telekomunikasaun tolu hanesan Timor Telecom (TT), Telkomcel no Telemor ne’ebé mak opera no iha tempu badak operadór telekomunikasaun foun ho naran CESLINK sei lansa hodi kompete iha merkadu.

Ho populasaun ne’ebé atinje milliaun 1,3, utilizadór ba simcard hamutuk milliaun 1,5 no ema ne’ebé ativu iha internet 560.000.

Nune’e mós ema ema ne’ebé ativu iha mídia sosiál hamutuk 560.000 no husi númeru ne’e, utilizadór 490.000 mak ativu husi telemovel.

Jornalista: Julia Chatarina

Editora: Rita Almeida

HAKEREK NO HATÁN

Please enter your comment!
Please enter your name here