Prezidente Repúblika, Francisco Guterres Lú Olo. Imajen Egas Cristovão

DILI, (TATOLI) – Prezidente Repúblika, Francisco Guterres Lú Olo, husu Estadu oinsá halo lalais prosesu rejistu no verifikasaun dadus ba kombatente libertasaun nasionál sira ne’ebé seidauk rejistu.

Nia haktuir hahú hosi Primeiru Governu to’o iha Oitavu Governu Konstitusionál, hotu-hotu hatudu liuhusi programa ida-idak nian katak hakarak rekoñese no valoriza kombatente libertasaun nasionál.

“Tempu to’o ona atu hanoin kle’an ba kotuk atu sukat ka tetu ita-nia hahalok katak to’o ohin loron ita rekoñese no valoriza duni sira ka lae”, Xefe Estadu dehan liuhusi ninia diskursu iha komemorasaun Loron Nasionál Veteranu ba daruak ne’ebé hala’o iha Palásiu Governu, domingu ne’e.

Ohin loron, tuir Lú Olo tempu di’ak liu atu Estadu no sidadaun ida-idak haree kle’an oinsá valoriza di’ak liu kombatente no veteranu timoroan sira ne’ebé sei moris hela maibé balun ki’ak teb-tebes, balun moras no ferik-katuas ona.

Nia hatutan subsídiu de’it la dignifika sira (veteranu) no dalaruma hamosu tan problema seluk, tan ne’e Estadu presiza haree programa reinsersaun sosiál atu sira bele moris ho dignidade nafatin nu’udar eroi nomós luta na’in sira ne’ebé sei saudável hela bele partisipa iha prosesu dezenvolvimentu ekonómiku liuhusi sira nia kbi’it ka matenek rasik.

“Sidadaun ne’e luta durante tinan barak maibé la hetan asesu edukasaun formál ka formasaun profisionál. Tan ne’e la hetan oportunidade empregu iha tempu ukun rasik án. Barak mai hosi família ki’ak, lahatene lee no hakerek maibé sira nia kakutak iha para halo funu to’o manán”, Lú Olo tenik.

Nia haklaken tuir dadus hosi Sekretaria Estadu Kombatente Libertasaun Nasionál katak ohin loron kombatente hamutuk 27.781 ka koresponde ba porsentu  2.1 (2.1%) populasaun Timor-Leste nian maka sai veteranu.

Atu valoriza veteranu sira ho didi’ak, Lú Olo afirma informasaun bázika de’it la to’o maibé Governu presiza hatene informasaun liu-tan atu bele halo análize di’ak no prepara polítika tuir dadus loloos. Katak presiza hatene kona-ba ida-idak nia estadu saúde, mentál, fízika, situasaun finanseira, kondisaun hela fatin, idade, serbisu saida, iha ka la’e asesu ba serbisu báziku, sá formasaun maka simu hafoin restaurasaun independénsia iha tinan 2002.

“Ho konsiénsia katak ita-nia rikusoin boot ida maka luta na’in sira ne’e duni. Sira maka ita-nia eroi, riin metin ba ita nia mehi ukun rasik án no riin metin ba nasaun”, eis gerileiru ne’e subliña.

Lú Olo salienta Estadu presiza atu luta na’in sira sai ezemplu ka sai modelu ba joven sira, ba sidadaun ida-idak, ba aman no inan sira no Estadu mós presiza luta na’in sira atu mantein pás no estabilidade.

“Sidadaun ida-idak presiza tuir sira nia espíritu sakrifísiu, dedikasaun, fó an tomak ba hotu-hotu nia moris di’ak (bem estar), sira nia onestidade, sira-nia espíritu domin ba pátria no ba povu”, nia hateten.

Jornalista: Xisto Freitas

Editora: Rita Almeida

HAKEREK NO HATÁN

Please enter your comment!
Please enter your name here