Primeiru-Ministru, Taur Matan Ruak. Imajen Egas Cristovão

DILI, (TATOLI) – Primeiru-Ministru, Taur Matan Ruak, haktuir loron 3 fulan-marsu 1981 maka loron importante hodi re-organiza estratejia polítika ba ukun rasik án ne’ebé lideradu hosi Xanana Gusmão depois hetan derota dahuluk hosi militár Indonézia hodi rezulta lideransa luta hanesan Saudozu Nicolau Lobato mate iha kombate iha loron 31 fulan-dezembru tinan 1978 hosi militár Indonézia.

Alende Nicolau Lobato iha mós lideransa másmu seluk hetan oho durante 1977 to’o 1979, tanba militár Indonézia harahun baze apoiu totalmente iha tinan 1978.

“Iha loron 3 iha konferénsia define estratéjia tolu ida alarga no amplia frente polítika, organiza povu, no desimina forsa vida inimigu nian katak orienta ba sira ne’ebé Indonézia uza hodi kaer kilat, ajuda sira”, dehan Xefe Governu bainhira hato’o palestra iha Sentru Konvensaun Dili, ohin hodi komemora loron veteranu ba aban nian.

Tuir Eis-Gerilleru ne’e forsa armada rejistadu pur-volta rihun 27 maibé mate no lakon durante baze apoiu rahun no falta kuaze militár 500 maka sei eziste iha ai-laran.

Taur dehan situasaun difísil maka mosu iha momentu ne’eba tanba lideransa polítika barak mate, populasaun pratíkamente evakua ba villa no Indonézia proklama vitória.

Maibé iha loron 3 marsu hala’o konferensia nasionál hodi re-organiza estratéjia polítika, involve timoroan hotu atu fó apoiu ba prosesu luta ba ukun rasik án, liuliu nomea lideransa foun ba komité sentrál FRETILIN no forma frente tolu hanesan diplomatika, klandestina no armada.

“Para manan tenke re-organiza hodi hetan kbiit para apoiu ita nia luta”, tenik Taur Matan Ruak.

Konferénsia nasionál ne’ebé hala’o iha tinan 38 liubá atu hetan forsa polítika no re-organiza án atu involve ema hotu ba luta libertasaun nasionál.

Semináriu nasionál ohin organiza hosi Ministériu ba asuntu Veteranu no Kombatente Libertasaun Nasionál.

Taur Husu Veteranu Organiza Án

Atu apoiu prosesu dezenvolvimentu presiza mós kontribuisaun hosi veteranu sira, tanba ne’e tenkeorganiza án no servisu hamutuk.

“Atu fó ita nia kontribuisaun ba dezenvolvimentu kestaun fundamentál maka ita organiza án, veteranu la organiza án, frente armada, frente klandestina no diplómatika tolu ne’e hotu la organiza án sei lakon unidade iha prosesu dezenvolvimentu Nasaun”, afirma Xefe Governu iha nia palestra ba semináriu hodi komemora loron veteranu ne’ebé hala’o iha Sentru Konvensaun Dili.

Nia haklaken papel veteranu sira mós importante ba apoiu dezenvolvimentu tanba ne’e, frente tolu ne’e tenke servisu hamutuk no unidade.

“Uluk ita funu ba ukun án agora ita funu ba moris di’ak, tanba objetivu nasaun nian maka bem estar no seguransa”, tenik Taur.

Estabelesementu konsellu veteranu mós importante hodi apoiu Estadu atu identifika veteranu falsu nomos aselera prosesu verifikasaun dadus veteranu 2009 seidauk prosesa no dadus pendente sira.

Taur Matan Ruak mós husu veteranu sira atu kontinua kuda ispíritu luta ba jerasaun foun hodi banati tuir.

Xefe Governu garante ho kontribuisaun veteranu sira nian sei tulun Estadu atu apoiu prosesu dezevolvimentu nasionál ba moris di’ak povu.

Jornalista: Agapito dos Santos

Editora: Rita Almeida

HAKEREK NO HATÁN

Please enter your comment!
Please enter your name here