Top

Durante Fulan Rua PDHJ Simu Ona Keixa 53

Imajen hosi Pájina PDHJ

DILI, (TATOLI) – Prevedória Diretu Ema-Nian no Justisa (PDHJ-sigla portugés) to’o ohin simu ona keixa hamutuk 53  hosi públiku relasiona ho prátika má administrasaun no violasaun diretu ema-nian.

“Keixa sira ne’e haree hosi diretu umanu, barak liu liga ho atuasaun polísia”, hatete Prevedora Jesuina Maria Ferreira Gomes, ba jornalista sira iha edifísiu Ministériu Justisa, Kaikoli, ohin.

Enkuantu liga ho boa governasaun, provedora ne’e haktuir tan prátika má administrasaun, atendementu públiku, sistema kontrolu  no asesu servisu públiku ba sidadaun.

PDHJ halo ona relatóriu pre-limináriu hosi kazu hirak ne’e hodi entrega ba komité jestaun no keixa hodi deside keixa sira ne’e atu rejista hanesan kazu ka suspende.

“Tanba iha keixa balun la tama iha PDHJ ninia mandatu, pur ezemplu keixa entre ema sivíl ho sivíl, tanba PDHJ nia mandatu atu haree sidadaun hasoru entidade públika hanesan funsionáriu públiku, polísia, forsa”, afirma.

Kazu sivíl, liliu liuliu kazu disputa rai, tanba ne’e PDHJ taka hodi entrega ba ministériu justisa, enkuantu sira ne’ebé iha indikasaun ba boa governasaun no diretu umanu rejistu nu’udar kazu hodi loke prosesu investigasaun  no balun refere ba instituisaun relevante.

Kontiudu kazu krime, rekomenda kazu ne’e ba ministériu públiku, relasaun ho korrupsaun haruka ba Komisaun Anti Korrupsaun (KAK), no violasaun  ba funsionalizmu públiku rekomenda ba Komisaun Funsaun Públika (KFP).

Jornalista: Agapito dos Santos

Editora: Rita Almeida

Publisidade

Leave a Reply

Latest Post

error: Content is protected !!