Governu Aprova Rezolusaun Limpeza Jerál

DILI, (TATOLI) – Governu liuhosi reuniaun Konsellu Ministru (KM) kuarta ne’e aprova Rezolusaun Governu, ne’ebé aprezenta husi Primeiru-Ministru (PM), Taur Matan Ruak, konaba promosaun asaun limpeza jerál.

“Konsellu Ministru aprova proposta rezolusaun Governu ne’ebé sei hahú atu halo limpeza jerál kada últimu sesta iha fulan ida nia laran. Ministériu hotu sei tun halo limpeza jerál husi tuku 14:00 to’o tuku 17:00”, tenik Ministru Reforma Lejislativa no Asuntu Parlamentár, Fidelis Leite Magalhães, ba jornalista sira ohin iha Palásiu Governu.

Nia hatutan: “Governu mós apela atu sosiedade sivíl sira, eskola no komunidade hotu atu bele kontribui iha inisiativa limpeza jerál ida ne’e”.

Hodi dehan, informasaun detallu sei fó sai husi Ministériu Administrasaun Estatál (MAE) no Sekretariu Estadu Komunikasaun Sosiál (SEKOMS) ne’ebé hetan ona responsabilisade atu divulga informasaun ba públiku kona-ba inisiativa limpeza jerál ne’e.

Governante ne’e apela: “Ba funsionáriu hotu iha ministériu, limpeza jerál ne’e la’ós oportunidade ba férias ou toleránsia de pontu, maibé limpeza jerál ne’e atu limpeza duni”.

“Ohin Primeiru-Ministru fó instrusaun ba membru governu sira atu fó serteza katak funsionáriu sira servisu duni, diretór sira halo kontrolu ba funsionáriu sira atu sira bele kontribui iha limpeza jerál”, dehan tan.

Nune’e, nia husu labele konfundi limpeza ne’e hanesan toleransia de pontu. “La’ós oportunidade atu ba férias sedu, maibé atu ita presta servisu no konta ba ita nia saúde rasik no sosiedade”.

Entretantu, tuir nota komunikadu husi portál ofisiál governu, promosaun asaun limpeza jerál ne’e husi aglomeradus populasaun, ho objektivu mobiliza organizasaun husi sosiedade sivíl sira hodi bele hamutuk ho orgaun no funsionáriu husi administrasaun públika no eskola sira hotu iha realizasaun asaun limpeza iha espasu públiku, no haforsa liután kompromisu no determinasaun Estadu iha konkretizasaun direitu ba sidadaun -hotu no ba ambiente ita ema nain, saudável no ekolójikamente ekilibradu.

Limpeza ne’e sei hahú iha loron 22 fevereiru 2019, no sei kontinua kada sesta kada fulan.

Jornalista: Julia Chatarina

Editora: Rita Almeida