DILI, (TATOLI) – Prezidente Konsellu Administrasaun Banku Nasionál Komersiu Timor-Leste (BNCTL, sigla iha portugés), Brígido de Sousa, hatete estatutu foun BNCTL ne’ebé Governu aprova ona ne’e atu korresponde ba estrutura loloos tuir prátika di’ak iha jestaun banku nian.
Tanba ne’e dekretu lei ne’ebé halo ne’e laiha mudansa boot, maibé mudansa siginifikativa mak sei iha revizaun ba estrutura governasaun banku nian.
“Daudaun governasaun BNCTL ne’e iha konsellu administrasaun ema na’in-lima ne’e hotu-hotu ezekutivu, entaun ne’e latuir prátika internasionál, tanba ne’e maka husi BNCTL mós hakarak muda no Governu apoia para define loloos responsabilidade iha governasaun banku nia iha diresaun ne’ebé maka konsellu administrasaun naun ezekutivu, sira só halo de’it polítika, estratéjia depois halo monitorizasaun, supervizaun, maibé iha membru konsellu administrasaun balu ne’ebé ezekutivu, sira maka halo jestaun ba banku loroloron nian”, Brígido afirma ohin iha edifísiu BNCTL iha Timor-Plaza.
Nune’e bele halo separasaun serbisu. “Se la’e, ita hotu-hotu ezekutivu entaun ita maka halo polítika, estratéjia, ita duni maka implementa ne’e ladún di’ak, tenke ida maka halo polítika, estratéjia sira ne’e, ida maka implementa depois ida prepara ne’e haree fali, ezekutadór ne’e halo tuir duni planu sira ne’ebé maka trasa ka la’e? Ida ne’e boa prátika iha banku no organizasaun sira boot ne’e presiza iha separasaun servisu, podér no responsabilidade atu asegura katak ida maka halo, ida maka ezekuta no ida fali halo supervizaun”.
Bainhira la’e maka kria konfuzaun iha banku rasik, iha funsionáriu nia leet nomós to’o iha kliente, sé loos maka halo desizaun iha banku ne’e.
Ho estatutu foun ne’e iha mudansa ida maka uluk mandatu konsellu administrasaun tinan haat no agora tun ba tinan tolu no bele reeleitu.
Tanba dekretu lei ne’e aprova ona maka sei haruka ba Prezidente Repúblika no bainhira promulga bele implementa ona.
Iha 13 fevereiru 2019 Governu aprova dekretu lei ne’ebé aprezenta husi Ministériu Reforma Lejislativa no Asuntu Parlamentár hamutuk ho ministériu tutela maka Ministériu Finansa no Ministériu Koordenadór Asuntu Ekonómiku.
Ministru Reforma Lejislativa no Asuntu Parlamentár, Fidelis Leite Magalhães, hatete benefísiu husi estatutu foun ne’e maka di’ak liu ba jestaun, hafasil atu foti desizaun no kontrolu atividade jestaun banku ho fásil no lais.
Notísia relasiona : http://www.tatoli.tl/2019/02/governu-aprova-estatutu-foun-ba-bnctl/
Jornalista: Maria Auxiliadora
Editora: Rita Almeida
