Reprezentante funsionáriu kazuál hosi Ministériu Edukasaun Juventude no Desportu hamutuk ema 272, ohin hato’o sira ninia preokupasaun ba Primeiru-Ministru, Taur Matan Ruak, iha Palásiu Governu. Imajen António Gonçalves

DILI, (TATOLI) – Reprezentante funsionáriu kazuál hosi Ministériu Edukasaun Juventude no Desportu (MEJD) hamutuk ema 272, ohin hato’o sira ninia preokupasaun ba Primeiru-Ministru (PM), Taur Matan Ruak, relasiona ho desizaun Ministra, Dulce de Jesus Soares, ne’ebé hapara kontratu iha 31 dezembru 2018.

Funsionariu kazuál hirak ne’e kompostu hosi ajente administrasaun no tékniku iha MEJD ne’ebé balun servisu ona durante tinan 15.

portavós funsionáriu kazuál, Paul da Silva Fernandes Flor. Imajen António Gonçalves

“Ami mai hato’o ba Primeiru-Ministru kona-ba ami nia situasaun hodi hatene no apar ba ami nia situasaun”, dehan portavós funsionáriu kazuál, Paul da Silva Fernandes Flor, depois hato’o sira nia preokupasaun ba Xefe Governu iha Palásiu Governu.

Nia dehan Xefe Governu simu preokupasaun hirak ne’e hodi husu atu kalma, akompaña prosesu diagnóstika ne’ebé sei termina iha loron 31 marsu 2019.

Portavós ne’e haktuir liután ba xefe ezekutivu katak desizaun MEJD nia afeta ba funsionamentu mákina iha MEJD nomos vida familia funsionáriu sira.

Portavós ho ninia membru sira kumpre pedidu Primeiru-Ministru atu pasensia hodi hein rezultadu diagnóstika nasionál hodi buka solusaun ba sira nia problema.

“Iha enkontru ami foin hatene fali hosi Primeiru-Ministru katak diagnóstika ne’e sei to’o 31 marsu 2019, tanba ne’e Primeiru-Ministru husu ami atu pasensia hodi hein prosesu ne’e la’o no ami kumpre ida ne’e”, afirma portavós.

http://www.tatoli.tl/2019/01/funsionariu-273-ho-kstl-sei-hasoru-mejd-buka-solusaun-ba-kontratu-la-extende/

http://www.tatoli.tl/2019/01/funsionariu-273-hosi-mejd-halo-protesta-tanba-la-kontinua-kontrata/

Jornalista: Agapito dos Santos

Editora: Rita Almeida

HAKEREK NO HATÁN

Please enter your comment!
Please enter your name here