DILI, (TATOLI) – Governu liuhosi Sekretáriu Estadu Formasaun Profesionál no Empregu (SEFOPE), Julião da Silva, ho Prezidente Ezekutivu ba Programa Lingua no Aprendizajen Korea (KSLP-TL-sigla inglés) Lee Jae Kwon, asina nota entendimentu hodi oferese formadór atu kapasita formasaun lian-korea ba timoroan kuaze 250 iha 2019.
Iha okaziaun hanesan SEFOPE asina mós nota entendimentu hanesan ho Sekretáriu Ezekutivu ba Fundu Dezenvolvimentu Kapitál Umanu (FDCH-sigla portugés), Isménio Martins da Silva, tanba apoiu osan ho montante rihun ualu nulu resin ba programa ne’e.
Tuir kalendáriu iha inisiu marsu 2019 sei hahú formasaun lian-korea ba aplikante sira ne’ebé antes ne’e hatama ona aplikasaun ba SEFOPE.
“Ita sei aumenta númeru formandu no aumenta oras, tanba uluk ne’e formasaun oras ida de’it maibé tuir planu sei aumenta ba oras rua kada loron”, dehan Sekretáriu Estadu, Julião da Silva, depois asina akordu ne’e iha ninia knaar fatin, Kaikoli, ohin.
SEFOPE maka sei responsabiliza osan ba formadór kuaze 10 resin, enkuantu governu Korea sei destaka sira ninia voluntáriu hodi hanorin lian-korea iha sentru formasaun Bekora no munisípiu sira.
Hatan kona-ba kandidatu rihun hitu ne’ebé SEFOPE rekruta ona antes, Julião hatete sei kria tan teste atu la’o tuir padraun ba prosedimentu operasionál hodi evita familiarizmu.
Akordu ne’e hanesan hahú ba programa haruka traballadór timoroan ba korea iha 2019, tanba iha tempu badak sei haruka kuaze ema nain lima nulu ne’ebe antes ne’e liu ona teste hodi servisu iha área peska.
Sekretáriu Ezekutivu FDCH, Isménio Martins da Silva, hatete akordu ne’e hanesan kontribui osan rihun 878 resin ba formasaun lian-korea iha 2019.
Alende ne’e, sei aloka mós pur volta rihun atus hitu resin ba formasaun traballadór timoroan ba Austrália no reforsa apoiu ba sentru formasaun sira iha teritóriu ho objetivu hodi hasa’e rekursu umanu ba apoiu dezenvolvimentu ekonómia.
“Ita pur volta milliaun $1.7, ita prepara hodi haree ba SEFOPE hodi atribui ba formasaun, haruka traballadór ba Austrália, lian-korea no reforsa iha sentru formasaun sira”, relata.
Entretantu formasaun lian-korea paradu kuaze tinan rua ho situasuan polítika rai-laran ne’ebé la’o ho osan duodésimu.
Jornalista: Agapito dos Santos
Editora: Rita Almeida
