Xefe Bankada Partidu Demokrátiku (PD), António da Conçeição ‘Kalohan'. Imajen TATOLI/António Gonçalves

DILI, (TATOLI) – Bankada Partidu Demokrátiku (PD) fó apoiu ba reapresiasaun proposta lei Orsamentu Jerál Estadu (OJE) 2019 hanesan instrumentu vitál hodi garante nafatin funsionamentu mákina Estadu, halo prestasaun servisu ba povu, promove no dezenvolve ekonomia nasaun nian.

“Bankada Demokrátiku hanesan uluk nafatin, ohin mós sei nafatin fó nia apoiu ba governu liuhosi reapresiasaun orsamentu, atu garante nafatin funsionamentu mákina Estadu”, Xefe Bankada PD, António da Conceição, bainhira halo intervensaun perante reapresiasaun dekretu lei númeru 4/V OJE 2019 iha parlamentu, ohin.

Iha votasaun finál globál ba dekretu PN, ho rezultadu afavór 40, kontra 25 no abstensaun zero. Tanba ne’e dekretu lei OJE aprovadu.

Bankada PD afirma OJE hanesan instrumentu polítika indispensável (nesesáriu) ba ukun nain. Ho orsmentu mak governu bele hala’o nia kna’ar no servi povu ho hatan problema hotu ne’ebé afeta povu nia moris. Hanesan edukasaun, saúde, bee moos, estrada, eletrisidade no seluk tan.

Tanba ne’e, bankada demokrátiku hanesan forsa polítika ida deklara nia pozisaun hodi fó apoiu nafatin ba orsamentu no husu deputadu sira nia komprensaun hodi deside hamutuk OJE atu fó fali konfiansa ba povu no hatudu ba lider nasionál sira.

OJE ne’e mai hosi governu no atu ezekuta nia programa hodi dezenvolve ekonomia hodi fó resposta ba povu nia nesesidade hetan ona veta hosi Prezidente Repúblika.

Enkuantu, Bankada Demokrátiku husu ba aman nasaun nia hodi tuur hamutuk, ko’alia ba malu atu projeta ukun rasik-án loloos katak nasaun livre no povu tenke livre.

“Ami laiha kbiit atu hanorin, basá imi nia esperénsia sira hanesan lisaun mai ami tenke aprende no ami tenke hatutan, imi nia sakrifísiu mak nafatin fó sasain loos ba planu ba oin hodi nafatin tane rai ne’e, tane eroi no servi povu, povu maubere no povu aswain.

Bankada Demokrátiku mós husu atu iha nafatin kultura respeita malu, tanba respeita hahú mihis ona, prinsípiu unidade no solidariedade ba malu mohu no lakon neneik, konklui iha intervensaun ne’e.

Jornalista: Zezito Silva

Editora: Rita Almeida

HAKEREK NO HATÁN

Please enter your comment!
Please enter your name here