DILI, (TATOLI) – Sekretáriu Estadu Ambiente (SEA), Demétrio do Amaral de Carvalho, asina Nota Entendimentu ho kompañia Heineken Timor-Leste hodi prodús Saku Ida Ai-hun Ida ne’ebé sei distribui iha loja sira.
Kooperasaun ida ne’e hodi fornese enkuadramentu ida kona-ba kooperasaun iha área interese komún ba poluisaun plástiku no promove resiklajen no hametin programa “Saku Ida Ai-hun Ida”.
“Ne’e programa ida ita hahú atu bolu ema hotu ne’ebé kompra iha loja, kada ida husi komparadór ne’e iha sira-nia liman responsabilidade atu kuda ai-hun ida, tanba ita hatete ba kliente sira ne’ebé sei bá sosa saku ida ne’ebé Heineken sei prodús”, Demétrio afirma ohin iha ámbitu asina akordu ho empreza Heineken ne’e iha Bebora.
Saku ne’e hakerek “Saku Ida Ai-hun Ida” ne’ebé sei tau iha loja sira no la’ós gratuita, maibé nia valór maka kliente ida ne’ebé foti saku ne’e fila ho valór nia tau hodi hetan saku ne’e mak kuda ai-hun ida.
“Se ita bele distribui saku ne’e dez mil ita kuda ai dez mil, se ita distribui saku ne’e rihun atus ida, ita kuda ai rihun atus ida. Ida ne’e maka ita hakarak, se ita bele halo esforsu di’ak la’ós de’it kombate lixu plástiku, maibé halo Timor-Leste matak, Timor-Leste ida ne’ebé saudavel liu ba ita hotu”, Sekretáriu Estadu ne’e dehan.
Aleinde Heineken, SEA asina akordu mós ho parte seluk iha intervensaun seluk kona-ba plástiku nian.
Kona-ba Heineken tanba sira-nia produtu serveza, soft drink sira no sira presiza kalén, plástiku hodi halo embalajen no empreza ne’e hanoin katak kontribui plástiku ba ambiente entaun, liuhusi kontribuisaun ida ne’e bolu dehan neraca pozitivu ida ba sira-nia produsaun kuantidade lixu ne’ebé priodús no ida ne’e ajuda tanba sira bele identifika projetu ida saku ida bele uza dalarua no tolu nian.
“Sira agora daudaun halo esforsu ho Mercy Corps no Caltech karik liuhusi kooperasaun ho USAID sei buka meiu atu halo resiklajen plástiku, ami hanoin ida ne’e kontribui ba kombate lixu plástiku iha Timor-Leste no mellora jestaun plástiku iha Timor-Leste”.
Jerente Jerál Heineken Timor S.A, Vinay Mathur, hatete saku ne’e sei prodús husi hena atubele uza beibeik nomós husi materiál publisidade ne’ebé sira halo ne’e hodi suku fali ba saku hanesan resiklajen duké bá so’e de’it iha lixu fatin.
“Objetivu ida ne’e atu troka saku plástiku ne’ebé momentu ne’e ita uza atu ema bele uza saku hena dalarua, dalatolu bainhira bá kompra sasán sempre reuza saku ida ne’e”.
Saku sira ne’e sei distribui ba loja sira no hahú ho númeru 300 hodi fahe ba supermerkadu no minimerkadu boot, neineik-neineik nia objetivu fahe ba loja hotu.
Vinay Mathur hatudu esperansa boot ba projetu ida ne’e no totalmente apoiu ba kampaña ida ne’e.
“Ami simu Sekretáriu Estadu Ambiente nia inisiativa proativa hodi hamenus lixu plástiku husi tasi-ibun no tasi Timor-Leste. Aleinde rezulta parseria ho eselénsia iha programa Saku Ida Ai-hun Ida, ami mós serbisu hamutuk ho ajénsia multilaterál no empreza seluk atu kria resiklajen sustentavel ba plástiku PET”.
Jornalista: Maria Auxiliadora
Editora: Rita Almeida
