Ministru Prezidensia Konsellu Ministru, Hermenegildo Augusto Cabral Pereira.

DILI, (TATOLI) – Governu liuhosi reuniaun Konsellu Ministru, ohin aprova proposta deliberasaun ba interese governu Amérika atu tulun Timor-Leste reabilitasaun aeroportu Baukau (koñesidu ho Lanud).

“Governu simu interese ida ne’e hosi governu Estadu Unidos Amerika (Estadu Naklibur sira), hodi tulun reabilita aeroportu Baukau”, hatete Ministru Prezidensia Konsellu Ministru, Hermenegildo Augusto Cabral Pereira, ba jornalista sira iha Palásiu Governu, ohin.

Governu konsidera aeroportu Baukau hanesan projetu infrasestutura boot ida hosi munisípiu parte leste, tanba ne’e governu simu interese ne’e.

Projetu ne’e oinsá atu halo estensaun ba pista ne’ebé governu konsidera aas liu ho aeroportu internasionál Prezidente Nicolau Lobato no portensiál iha nasaun ho ninia lokalizasaun espesiál.

Agio Pereira realsa atu aselera prosesu negosiasaun ho Governu Amérika maka nomea Ministru Defeza, Filomeno Paixão, Ministru Obra Públika sira no Ministru Tranporte no Komunikasaun atu trata asuntu ne’e.

“Ohin Konsellu Ministru indika ona ministériu defesa no ministériu obras públikas no ministériu transporte no komunikasaun nu’udar interlokutór reprezenta governu nian hodi ko’alia ho governu Amérika hodi avansa prosesu ne’e”, tenik Ministru.

Nia hatete ekipa tékniku no peritu Amérikanu oras ne’e to’o ona iha nasaun hodi halo estudu tékniku molok implementa projetu refere.

Jornalista: Agapito dos Santos

Editora: Rita Almeida

1 KOMENTÁRIU

HAKEREK NO HATÁN

Please enter your comment!
Please enter your name here