Ministru Defeza no Ministru Interiór Interino, Filomeno da Paixão de Jesus. Imajen Xisto Freitas

DILI, (TATOLI) – Ministru Defeza no Ministru Interiór Interino, Filomeno da Paixão de Jesus, hateten dezenvolvimentu Polísia Nasionál Timor-Leste (PNTL) no FALINTIL-Forsa Defeza Timor-Leste (F-FDTL) hahú integradu, nune’e forsa rua bele komplementa malu, maibé la’ós kompete malu no hadau malu.
“Ita moris ho plafon. Ita nia osan uitoan de’it. Tenke haree ba área seluk hanesan agrikultura, saúde, edukasaun no ekonomia en-jerál. Tanba ne’e maka PNTL no F-FDTL tenke iha planeiamentu integradu para poupa osan. Labele iha mariña rua. Labele iha forsa rua iha fronteira. Labele iha forsa espesiál rua. Repete-repete ne’e atu halo saida? Atu tiru malu ho sé”, Governante ne’e ba jornalista sira iha Palásiu Prezidente Nicolau Lobato, Bairru Pité, tersa ne’e, hafoin hala’o enkontru ho Prezidente Repúblika, Francisco Guterres Lú Olo.

Nia hatutan hahú ohin ba oin, F-FDTL no PNTL submete ba orientasaun ida de’it. Hodi hatutan Lei Seguransa Nasionál hateten kuandu polísia laiha kbiit atu halo atuasaun ba situasaun ruma, Estadu bele autoriza F-FDTL atu kompleta.

“Estadu nia sasán iha liman loos no karuk. Tanba ne’e, liman karuk labele, liman loos bele ajuda. La’ós kria fali forsa rua ne’ebé hanesan depois osan iha ne’ebé maka atu fó han sira”, argumenta.

Aleinde ne’e, Filomeno tenik sei kria mós rekezitu ba asuntu profisionalizasaun forsa rua (PNTL no F-FDTL), katak, atu sai profisionál tenke matenek.

“Por-ezemplu iha F-FDTL dezde tinan 2008, 2009 no 2011, ita halo profisionalizasaun ba F-FDTL. Katak, atu sai Alfeiris, tenke lisensiadu nune’e bele intende sasán. F-FDTL ohin loron laiha ofisiál ida maka la lisensiadu, anaunser katuas veteranu sira, tanba sira ne’e mai hosi esperiénsia funu, hatene estratéjia militár no polítika”, afirma.

Katak tan: “Veteranu balun liu-liu sira ne’ebé asumi diviza Tenente Koronél mós ba hasai ona kursu lisensiatura”.

Tanba ne’e, eis Vise Xefe Estadu Maior ne’e hateten membru polísia mós tenke hasai kursu lisensiatura, katak se maka sai ofisiál tenke lisensiadu.

Jornalista: Xisto Freitas

Editora: Rita Almeida

HAKEREK NO HATÁN

Please enter your comment!
Please enter your name here