Logo UNTL.

DÍLI, (TATOLI)-Ministériu Ensinu Superiór, Siénsia no Kultura (MESSK) anunsia katak kandidatu estudante Universidade Nasionál Timor Lorosa´e (UNTL) asesu liuhusi kanál tolu hanesan kanál A (réjime jerál), kanál B (réjime espesiál) no kanál C (réjime oportunidade).

Kanál A ne´e fó fatin ba finalista ensinu sekundáriu, kanál B fó fatin ba kandidatu sira n´ebé mak sei iha situasaun ezesionál no kanál C fó fatin ba sidadaun timoroan sira ne´ebé mak ramata ensinu sekundáriu iha tinan haat ba kotuk.

Pro-reitór Asuntu Akadémiku UNTL, Miguel Maia dos Santos informa, réjime tolu ne´e liuhusi prosesu selesaun no réjime sira ne´e hatuur tuir nia persentajen katak réjime jerál asesu UNTL ne´e ho nia persentajen 70, réjime oportunidade ne´e ho nia persentajen 15 no réjime espesiál mós ho nia persentajen 15; totál pursentu 100 ho númeru determinadu ne´ebé MESSK fó sai.

Katak, kandidatu estudante na´in 2.986 mak aprovadu tama UNTL no Institutu Politékniku Betano (IPB) ba kanál A no B. Ba UNTL kanál A hamutuk 2.222 o IPB hamutuk 144 ho totál 2.366 nomós kanál C hamutuk 508 no IPB hamutuk 22 ka ho totál 530.

“Entaun ho situasaun ida ne´e, refleta tiha ona ba númeru ne´ebé mak fakuldade no departamentu sira hatuur. Númeru ne´ebé fakuldade no departamentu sira hatuur ne´e bazea ona ba espasu ne´ebé iha, númeru profesór, atu bele halo rásiu entre alunu ho profesór,” informa Pro-reitór Asuntu Akadémiku UNTL, Miguel Maia dos Santos, ba Ajénsia TATOLI, iha nia gabinete, Kampus Sentrál UNTL, Díli, ohin.

Pró-reitór Miguel Maia mós akresenta katak haree ba númeru profesór UNTL sira ne´ebé sei ba eskola, nesesita osan atu UNTL bele rekruta dosente sira, tantu dosente integrál, dosente parte tempu nomós profesór konvidadu.

“Haree ba orsamentu ne´e, departamentu sira define tiha ona nia númeru ne´ebé mak iha. Tanba ne´e, ha´u hanoin katak ho réjime tolu ne´ebé mak iha ne´e sufisiente no Universidade Nasionál Timor Lorosa´e atu bele halo formasaun ida hodi hasa´e kualidade tuir nesesidade nasaun nian,” informa akadémiku ensinu superiór públiku ne´e.

Atu garante efetividade prosesu aprendijazen, Profesór Miguel Maia mós hateten, nu´udar padraun no akreditasaun ne´ebé mak ANAA (Agência Nacional Para Avaliação e Acreditação Académica) propoen no aseita internasionalmente katak tenke iha materiál ne´ebé adekuadu, tantu haree husi preprasaun materiál lojístika ne´ebé tenke adekuadu no konfortável duni ba estudante sira.

Se klase normál ida, rásiu entre estudante no profesór ba siénsia exata entre 20 to´o 30 ne´e ultrapasa tenke kria tan turma paralelu ruma. Se kria tan turma paralelu ruma, presiza tan sala, materiál apoiu, presiza tan profesór.

Tanba ne´e mak hanoin didi´ak tiha ona atu bele simu tuir númeru i tuir númeru ne´e iha tiha ona jestaun eskolár ida, ne´ebé departamentu sira tetu tiha ona, kria tiha ona entre númeru ne´ebé mak tama no sai tanba tenke mós halo balansu entre tama hira, sai hira, depois ativu hira, pásivu hira.

“Nune´e mak bele hetan númeru ida adekuadu hodi fornese edukasaun ne´ebé di´ak hodi forma sira, transfigura sira sai graduadu ida iha futuru, graduadu ida ho kualidade elevadu,” dehan akadémiku ne´e.

Pro-reitór Asuntu Akadémiku UNTL, Miguel Maia dos Santos informa katak inskrisaun kandidatu estudante réjime espesiál hahú ho despaxu reitór ninian, despaxu husi reitór nian bazea ba manuál ne´ebé MESSK aprova no despaxu ne´e magnífiku reitór prepara tiha ona iha fulan outubru i delibera iha 12 janeiru, foin dadauk ne´e.

Despaxu ne´e, ekipa serbisu ne´ebé kompostu husi ekipa koordenadór, vise-koordenadór, sekretáriu no nia membru rua; ema na´in lima, atu bele organiza oinsa atu atende kanál espesiál.

“Oras ne´e dadaun, kanál espesiál la´o hela durante tempu limitadu, três dias; hahú ohin to´o kuarta-feira mai. Iha fali parte seluk ne´ebá,  naran fó sai tiha ona katak admitidu mai UNTL, sira mós halo dadaun inskrisaun,” konklui Pro-reitór Asuntu Akadémiku, Miguel Maia.

Notísia relevante; http://www.tatoli.tl/2019/01/estudante-nain-2-986-aprovadu-tama-untl/

Jornalista: Rafy Belo

Editór : Manuel Pinto

HAKEREK NO HATÁN

Please enter your comment!
Please enter your name here