Ministru Obras Públikas, Salvador Soares dos Reis Pires. Imajen António Goncalves.

DILI, (TATOLI) – Ministru Obra Públika (MOP), Salvador Eugénio Soares dos Reis Pires, hateten governasaun da-ualu iha ona polítika hodi hadi’a sistema modernizasaun ba automatizasaun liña eletrisidade ba fornesementu eletrisidade ba sidadaun ho di’ak liután.

Nia hatete asuntu ne’e bainhira konsulta planu tempu badak, naton no naruk ministériu nian ba Primeiru-Ministru, Taur Matan Ruak, iha Palásiu Governu, kinta ne’e.

Tinan ne’e, nia dehan planu governu mak loke konkursu mapamentu ba sistema ezistente depois 2020 hahú implementa polítika.

“Iha 2019 tama ba planu, depois 2020 ita hanoin ona atu implementa ba melloramentu sistema distribuisaun, liuliu iha área DIli”, katak nia.

Tuir ministru sistema fornesementu eletrisidade iha kapitál uza sistema tuan, mesmu governu anteriór iha 2016 investe ona osan ba sistema ne’e, maibé fatin barak seidauk instala.

Durante ne’e problema ba Eletrisdade de Timor Leste (EDTL) labele halo instalasaun iha loron servisu, tanba ne’e maka uza oras rua iha loron sabadu no domingu hodi halo instalasaun ba sistema.

“Melloramentu ne’ebé uluk eziste ona la kobre atu moderniza automatizasaun sistema distribuisaun eletrisidade iha Dili”, tenik tan.

Sistema modernizasaun ne’e sei apoiu EDTL bainhira iha avariasaun fatin ruma, servisu EDTL bele izola liña iha fatin refere depois fornese eletrisidade hosi feeder no fonte ba substituisaun seluk ne’ebé sei harii iha portu Tibar.

Iha parte seluk atu apoiu atendementu, dezenvolve instituisaun EDTL, governu mós prepara ona polítika reforma instituisaun hodi sai empresa públika.

Iha tempu badak MOP sei aprezenta lei kona-ba reforma institusionál EDTL ba Konsellu Ministru.

Governante ne’e esplika akontese eletrisidade dala ruma mate iha kapital Díli, tanba impaktu hosi sirkuitu no ai-tohar hodi afeta fiu kotu.

Jornalista: Agapito dos Santos

Editora: Rita Almeida

1 KOMENTÁRIU

  1. atu fo hanoin deit ba Minitsri Obras publiko ,seim duvidas ho progama nebe minstru aprsenta progama kona ba eletricidade ba PM…!!! maibe atu fo hanoin deit EDTL seidauk bele atu sai empresa publika ho rajaun Rekursu sei dauk bele,,!!! presija halo estudu klean,,,tamba ne seitor privado.

HAKEREK NO HATÁN

Please enter your comment!
Please enter your name here