Ministra Edukasaun Juventude no Desportu, Dulce de Jesus Soares. Imajen Tatoli/ Egas Cristóvão

DILI, (TATOLI) – Ministra Edukasaun Juventude no Desportu, Dulce de Jesus Soares, hatete governu Estadu Unidu Amerika liuhosi ninia ajénsia sei apoiu governu Timor-Leste liuhosi projetu ida naran hatutan hodi identifika eskola balun iha teritóriu sai projetu pilotu ba implementasaun programa merenda eskolár ho kualidade di’ak.

“Modelu oin-oin maka sira sei halo hanesan hamutuk ho komunidade halo to’os, hanorin komunidade tein ai-han ida saudavel, liuhosi servisu hamutuk hoi inan aman no profesór ho alunu sira rasik”, ministra Dulce de Jesus hatan ba relatóriu monitorizasaun PDHJ ne’ebé lansa iha salaun Komisaun Funsaun Públika Mataduro, ohin.

Governante ne’e rekoñese programa ne’e seidauk la’o di’ak no efisiente, liuliu alokasaun orsamentu, implementasaun menu no seluk tan, tanba ne’e ba 2019 sei kontinua hadi’a.

“To’o agora orsamentu ba programa  ne’e sei mantein iha bens servisu hodi aloka ba eskola públika sira, enkuantu eskola Katólika, eskola fundasaun no eskola komunitária maka tama iha tranferénsia públika, entaun orsamentu iha bens servisu sai dezafiu ba ministériu edukasaun  maibé governu sei nafatin esforsu ho evidénsia  hirak ne’e bele hadi’a hodi hetan rezultadu di’ak”, realsa Governante.

Tuir polítika Governu ne’ebé estabelese ona iha programa merenda eskolár, kada estudante hetan $0.25 no foos grama 200 kada loron multiplika loron ativu prosesu aprendizajen.

Nia rekiñese mós implementasaun menu seidauk la’o di’ak, tanba estok ai-han lokál kada eskola la sufisiente atu tein ba estudante sira.

Rezultadu monitorizasaun PDHJ ne’ebé lansa ohin sujere atu hadi’a sistema alokasaun orsamentu, tanba nota implementasaun programa ne’e kada tinan tarde.

Alende ne’e falta kontrolu no inspesaun hosi inspetór edukasaun ba diretór eskola sira iha teritóriu, kestaun falta bee mos, ijiene hodi obriga estudante tenke lori ai-sunu no bee-moos hodi apoiu programa ne’e.

Jornalista: Agapito dos Santos

Editora: Rita Almeida

HAKEREK NO HATÁN

Please enter your comment!
Please enter your name here