Komisáriu Komisaun Anti Korupsaun, Sergio Hornai, bainhira simu pose iha uma fukun Parlamentu Nasionál, segunda, (21/1/2019). Imajen António Goncalves

DILI, (TATOLI) – Prezidente Parlamentu Nasionál, Arão Noe, hateten tempu badak nia laran orgaun lejislativa sei aprova Lei Anti Korrupsaun hodi reforsa Komisaun Anti Korrupsaun iha Timor-Leste.

“Iha tempu badak Parlamentu Nasionál sei aselera aprovasaun lei anti korrupsaun hodi reforsa servisu Komisaun Anti Korrupsaun nian”, Arão Noe ba jornalista sira iha parlamentu hafoin toma pose ba Komisáriu Komisaun Anti Korrupsaun, Sergio Hornay, ohin.

Públiku preokupa Lei Anti Korrupsaun, Arão Noe, dehan parlamentu hanoin ona katak Komisaun A bele konklui lais relatóriu pareser  iha janeiru no fevereiru bele tama ona ba debate iha plenária hodi hetan aprovasaun.

Lider másimu parlamentu husu ba komisaun A atu aselera hodi hato’o relatóriu pareser proposta lei anti korrupsaun atu nune’e bele hetan aprovasaun.

Maske nune’e, Arão Noe reafirma la’os Lei Anti Korrupsaun mak ita halo prosesu ba aktu kriminál, ida ne’e la loos. Tanba ita iha kódigu penál, iha artigu 11, kapítulu 8 ne’ebé define aktu kriminál no dadaun ema barak mak simu ona pena iha tribunál tanba lei ne’e iha.

Tanba ne’e, Lei Anti Korrupsaun hanesan atu kompleta tan krime balu tuir proposta lei ne’ebé hatama hosi deputadu sira mak enrekesimentu ilísitu, krime ba reponsabilidade projetu ne’ebé fahe tutan.

Nune’e, luta kontra korrupsaun tenke la’o hamutuk ho konsiénsia maka’as no mós hametin prinsípiu interese koletivu, importante liu dúke individualizmu ka interese privada nian.

Ho razaun hirak ne’e mak kombate korrupsaun tenke envolve debate kona-ba interese públiku, demokrásia, sidadania, direitu no ema nia dignidade.

Jornalista: Zezito Silva

Editora: Rita Almeida

HAKEREK NO HATÁN

Please enter your comment!
Please enter your name here