Prokuradór Jerál Repúblika, José da Costa Ximenes akompañadu ho Prokuradór Distritál sira nomós inpestora hasai pose hamutuk ho ekipa Uma Mahon Casa vida, hafoin entrega apoiu umanitária. Foto TATOLI: Rafy Belo

DILI (TATOLI)-Ministériu Públiku (MP) fó apoiu umanitária ba vítima insestu no violasaun seksuál sira no seluk tan ne´ebé hamahan aan iha uma Mahon Casa Vida, Bidau-Lecidere, Díli.

Prokuradór Jerál Repúblika (PJR), José da Costa Ximenes informa ba jornalista sira husi órgaun komunikasaun sosiál oioin katak apoiu umanitária ne´e sira fó tuir kbiit ne´ebé iha. Maske nune´e, PJR ne´e konsidera katak ida ne´e la´ós importante maibé importante liu mak bele enkoraja vítima na´in 65 ne´ebé hamahan aan iha fatin ne´e.

Vítima sira ne´e balun insestu, balun abuzu seksuál ba minór, balun violasaun seksuál. Entaun PJR ba ho prokuradór distritál sira, xefe prokuradór sira husi munisípiu haat; Baucau, Díli, Suai (Covalima) no Oe-Cusse, hamutuk vizita vítima sira iha Casa Vida ne´e.

Prokuradór Jerál Repúblika, José da Costa Ximenes entrega envelope ida ba Diretora Ezekutivu Casa Vida, Suzana Ximenes, nu’udar apoiu umanitária ba vítima sira. Foto TATOLI: Rafy Belo

“Objetivu atu sira rasik hatene sentimentu husi vítima sira ne´e. Ohin husu prokuradór, balun nia prosesu la´o halo nusa? Karik, balun prosesu pendente, ita halo para reforsa liután ba oin. Ami fó korajen, ami hateten ba sira (vítima-red) katak sira la mesak,” informa Prokuradór Jerál, José da Costa Ximenes, iha Uma Mahon Casa Vida, Bidau-Lecidere, Díli, sábadu (19/01).

PJR, José da Costa akresenta, se ema balun preokupa ba vizita sira ne´ebé iha prizaun, Ministériu Públiku nia preokupasaun boot maka buka sira ne´ebé sai vítima, iha fatin ne´ebé sira organiza aan ba.  “Tanba ida ne´e mak ami mai iha fatin ida ne´e,” Prokuradór, José da Costa Ximenes fó razaun.

Seluk, tuir Prokuradór katak alende Ministériu Públiku enkoraja vítima sira, buka mós atu hatene sira-nia kazu para aselera prosesu balun ne´ebé, karik sei pendente. “Ami mós fó apoiu umanitáriu oituan que Ministériu Públiku iha. Sasan balun  que iha oituan, ami fó apoiu. Maibé ida ne´e la´ós importante. Importante mak ita enkoraja, fó hanoin ba sira katak sira la mesak,” nia reforsa tan.

Prokuradór timoroan ne´e haklaken, se arguidu sira, ema ba motiva sira atu sira fila fali sai hanesan ema normál iha sosiedade, Ministériu Públiku mós  fó hanoin ba vítima sira katak mezmu sira sofre, apaña psikolojikamente, tanba sira mesak labarik, enkoraja sira, katak sira nafatin importante iha sosiedade.

Sira-nia vida la termina ho problema ne´ebé mak sira enfrenta, sira la mesak i Ministériu Públiku iha para defende sira-nia direitu.“Ami iha serbisu prokuradória minór no família, purtantu sira ne´ebé kaer kazu sira ne´e, sira haree, sei fila fali ba halo avaliasaun, haree oinsa prioridade ba oin”.

Iha fatin hanesan, Diretora Ezekutiva Casa Vida, Suzana Ximenes demonstra nia sentimentu katak prezensa Ministériu Públiku ba sira-nia uma mahon ne´e nu´udar onra boot ida no prezensa ne´e sira hein ona dezde antes.

“Importante tebes, Prokuradór sira mai hotu iha ne´e, sira haree ho matan diretamente oinsa ami-nia serbisu, atendimentu ba ami-nia kliente, vítima sira, liliu ba alin ki´ikoan sira,” konsidera Diretora Suzana Ximenes perante jornalista sira.

Nia mós informa katak maioria kazu ne´ebé rejista iha Uma Mahon Casa Vida mak kazu abuzu seksuál no kazu insestu. “Iha mós kazu fíziku, psikologa, iha mós kazu sívil hanesan iha problema entre inan no aman fahe malu; kazu abandona,” informa tan diretora timoroan ne´e.

Diretora Ezekutiva Casa Vida, Suzana Ximenes haktuir, alende labarik na´in 65 ne´ebé sai vítima ba violasaun oioin ne´ebé oras ne´e dadaun sei hamahan aan iha Uma Maho Casa Vida, antes ne´e kuaze iha vítima menor idade na´in 80 mak akomoda iha fatin ne´e maske iha tinan kotuk, iha fulan Dezembru, Uma Mahon halo ona, depende ba kazu, reintegra ona vítima besik na´in 20.

Nune´e mós haktuir katak Uma Mahon Casa Vida, alende halo protesaun ba vítima menor idade sira, Casa Vida mós kria no dinamiza atividade oioin hanesan terapia okupasionál, emprendedorizmu sosiál no projetu ne´ebé mak bele fó oportunidade ba vítima sira, tanba vítima sira iha fatin ne´e ho tempu naruk.

“Entaun sira mai, ami iha ne´e iha ospitalidade, restaurante, ne´ebé sira iha oportunidade tuir treinamentu, oportunidade ezerse sira-nia talentu, iha mós arte vida; kursu abilidade ne´ebé mak atu sira sai husi ne´e, sira hatene buat ruma, sira bele halo buat ruma ba sira-nia moris, kursu sira oioin ne´ebé mak hanesan oportunidade fó sira atu sira expresa i sai hanesan bukae ida,” dehan diretora ne´e.

Entretantu, alende vizita Uma Mahon Casa Vida, antes ne´e, iha retiru anuál Ministériu Públiku nian ne´ebé hala´o iha 2017, vizita mós orfanatu ida iha Munisípiu Bobonaru, Postu Administrativu Maliana.

Jornalista: Rafy Belo

Editór : Manuel Pinto

HAKEREK NO HATÁN

Please enter your comment!
Please enter your name here