inistru Agrikultura no Peska, Joaquim José Gusmão dos Reis Martins. Foto/MAP.

DILI, (TATOLI)-Ministru Agrikultura no Peska, Joaquim José Gusmão dos Reis Martins, hatete atu responde ba situasaun inseguransa ai-han no má nutrisaun iha Timor-Leste maka tenke haforsa no diversifika setór agrikultura hodi hasa’e produsaun ne’ebé kontribui diretamente ba família umakain nia, promove ka hamoris ekonomia povu hodi hamenus ki’ak liuliu iha área remota.

“Promove agrikultura ne’ebé sensitivu ba klima no sustentável. Dezenvolve setór agrikultura hanesan atividade ekonómika ida ne’ebé bele fó rendimentu ba produtór sira atu sosa ai-han, selu serbisu no buat seluk ne’ebé la’ós ai-han”, ministru Joaquim José Gusmão dos Reis Martins afirma iha nia intervensaun, lansamentu relatóriu analiza króniku dahuluk faze klasifikasaun integradu (IPC) ba seguransa ai han iha Timor-Leste iha Ai tarak-Laran, Kinta ne’e.

Aleinde ne’e hadi’a mós kualidade no kuantidade ai-han no prátika dieta ne’ebé inklui konsome ai-han ne’ebé seguru, nutritivu no variedade.

“Ba seguransa ai-han Agrikultura ka’er knaar ida boot tebes tanba prodúz ai-han ne’ebé nutritivu ba ita-nia populasaun. Tanba ne’e maka rekomendasaun ne’ebé ita iha ne’e oinsá maka hasa’e tan produsaun, halo oinsá mak iha produsaun agríkola ne’ebé nutritivu, ne’ebé maka bele iha asesu ba merkadu para família agrikultór bele hetan osan para bele hetan ai-han ne’ebé di’ak liu”, Joaquim esplika.

Papél Ministériu Agrikultura nian oinsá maka bele prodúz ai-han ne’ebé maka sufisiente ba povu para labele enfrenta buat ida hamlaha.

“Ita-nia planu dezenvolvimentu nasionál no Objetivu Dezenvolvimentu Sustentável númeru 2 (halakon hamlaha) katak iha 2030 ita tenke atinje zero hamlaha. Iha Timór mós adota ida ne’e, ita halo esforsu hotu hamutuk ho ministériu sira seluk para to’o 2030 Timor-Leste atinje zero hamlaha no zero má nutrisaun”.

Tanba ne’e produtu ne’ebé Timor-Leste tenke dezenvolve maka’as mak hare, batar, modo-tahan, fehuk sira ne’e tanba ne’e maka hahán primária povu nian.

Tuir relatóriu IPC hatudu ema hamutuk 430.000 ka porsentu 36 husi populasaun Timor-Leste enfrenta inseguransa ai-han krónika, no husi ne’e hafahe ema 176,000 ka porsentu 15 mak hetan inseguransa ai-han grave no 254.000 ka porsentu 21 hasoru inseguransa alimentár moderadu.

Lee mós : http://www.tatoli.tl/2019/01/munisipiu-tolu-enfrenta-inseguransa-ai-han-kronika/

Jornalista : Maria Auxiliadora

Editór : Manuel Pinto

HAKEREK NO HATÁN

Please enter your comment!
Please enter your name here